الخميس، 15 مايو 2008

أنا مش ملاك


أنا مش ملاك ...

أه مش ملاك !

وعشان اكون أمين معاك ...

انا مش شيطان ...


متبصليش وعنيك تكون مستغربه

اصلي منيش اراجوز ايديه في الكهربا

ولاني ماشي في الشوارع

وطولي فارع ...

وضهري حالف ينحني ...

مع انهم بيقولو اني راجل غني ...

انا مش غني !

ومش فقير ...

ومش ملاك ...

وهقول كمان ... انا مش شيطان !


بس انت ركز حبتين ...

لو كنت يعني ... تحب تعرف ابقى مين؟


عارف القمر؟

ايوه القمر ... بتاع حكاوي العاشقين

ابو ضي هادي ...

ابو نور جميل ...

ابو ليل ساعات بيكون طويل ...

وساعات نحسه ثانيتين ...


ايوه القمر ... اللي هناك فوق في السما

وبيختفي ... لو في سحابه مغيمه

وفثانيه يرجع ...

يشهد اوام على حبنا

يفرح اوي وكانه واحد مننا


وساعات كتير تلاقيه وحيد وسط النجوم

واللحظه بتعدي عليه الف يوم

وكانه مجروح زينا ...

مش قلتلك كأنه واحد مننا ؟!


ايوه القمر ...

الي عشان آل نشكره

بعتنا ليه (نيل) افندي يصوره

واما رجع و(داس) عليه ...

قالنا ...

ان الي كان بيحبنا

وكانه واحد مننا ...

مهوش قمر ؟!


امال ايه يا نيل أفندي ؟

لقيته انسان زينا ؟

فيه ملايكه بتطيع اوامر ربنا ؟


طب والدموع

الي بشوفها في عينه لما ...

يكون حزنان اوي...

دي بحر مالح ؟

ولا نيل زي اللي موجود عندنا ؟


طب بلاش الدمعتين ...

وانت ماشي هناك ...

لقيت ورقه وقلم ؟

دفتر وفيه سنين كتيره ...

مليانه بالخوف والألم ؟


طب بلاش سيرة الألم اللي مالي ارضنا ...

قوللي طيب ... لقيت فيه الهنا ؟


طب لقيت صورتي هناك متعلقه ؟

انا وحبيبتي والأمل ؟

انا وحبيبتي والنجوم ؟

انا وحبيبتي والقمر ؟

اكدب عليا ... قلي انك شفتنا

اصلك انت مهما تقولي ...

مش هصدق ... غير انه واحد مننا !


بتقولي لازم اسمعك ؟

هتقوللي مين هوا القمر ؟


بتقول حجر ؟

بتقول تراب ؟

بتقول جبال ؟


بتقول غموض ؟

بتقول سكون ؟

بتقول ظلام ليله طال ؟


هتقوللي ايه ولا ايه ؟

لكني هفضل أسألك ...

ملقيتش صورتي هناك متعلقه ؟

انا وحبيبتي والأمل ؟

انا وحبيبتي والنجوم ؟

انا وحبيبتي والقمر ؟

اكدب عليا ... قلي انك شفتنا

اصلك انت مهما تقولي ...

مش هصدق ... غير انه واحد مننا !


وانت برضو لازم تصدق

اني بشر ...

ومنيش ملاك ومنيش شيطان

وان القمر ...

عمره مكان حتة حجر !


أقول كمان ؟

انا بشر ...

ومنيش ملاك ومنيش شيطان!

والقمر عمره مكان ...

حتة حجر !



تمت
انا مش ملاك
محمد نبيل
15/5/2008

هناك 43 تعليقًا:

Darsh يقول...

أنا مش ملاك ...
أه مش ملاك !
وعشان اكون أمين معاك ...
انا مش شيطان ...

*********

أنا مش ملاك ...
أه مش ملاك !
وعشان اكون أمين معاك ...
انا مش شيطان ...

-------------------------------------------------------


ووووووووووووه

أول واحد يرد ...

يعني يا بختك يا سعدك يا هناك

جميلة قوي يا ليكو بجد

و هما دول أروع فقرتين عجبوني

جامدة بجد

مش بقولك في العامي أحسن م الفصيح مش مصدق

ياللا يا عم

أديني نورت البلوج بتاعك ... ثقة في النفس بقى ... وثيق من نفسي وثيق من نفسي

ليكوريكا يقول...

ايه اللي جابك هنا يا ولد

سايب الفيتو والدح وجاي تردلي في البلوج

وبعدين اخلع الكوفيه الحمرا اللي انت لابها دي

لان الشتا خلص ده اولا

ثانيا انت زملكاوي يبقي تلبس كوفيه حمرا ليه ؟

........................

يعني خلينا نقول منورني يا صلصه

ولو ان ثقتك بنفسك دي تقلق :)

semsem يقول...

لست ملاك واكرة ان تصفنى بذلك
كما انى ليس شيطان واكرة ان اكون ذلك
ولا اريد الا ان اكون كما انا بشرا
احمل بداخلى جميع المتناقضات
اعيش بروح الملائكه وشقاوة الشياطين !
ولا اريد صفه الملائكه التى تطلقها عليا
لانى اشعر حينها انك تتحدث عن اخرى
فانا الاافهم حياه الملائكه ولا اريدها
انى اريد ان اصيب واخطا
احب واكرة ...اموت واحيا
احزن وافرح ...انجح وافشل
فانا فى النهايه بشر
ولا شى غير ذلك
سمسم

elsa7era يقول...

ازيك ياباشا
لحنا مليكة ولا شيطين ولا عيشين فى جنة ولا فى نار بس الجديد اننا الى بنحدد لنفسنا امتا نبقى فرحنين وامتى نبقى زعلنين
وعلى راى الى قال الدنيا دى عملة زى كباية الشاى انت الى بتحدد امتى تكون مرة وامتى تبقى مسكرة
وسلامى لكل حرف كتبتة
Reda

ليكوريكا يقول...

لست ملاك واكرة ان تصفنى بذلك
كما انى ليس شيطان واكرة ان اكون ذلك
ولا اريد الا ان اكون كما انا بشرا
احمل بداخلى جميع المتناقضات
اعيش بروح الملائكه وشقاوة الشياطين !
ولا اريد صفه الملائكه التى تطلقها عليا
لانى اشعر حينها انك تتحدث عن اخرى
فانا الاافهم حياه الملائكه ولا اريدها
انى اريد ان اصيب واخطا
احب واكرة ...اموت واحيا
احزن وافرح ...انجح وافشل
فانا فى النهايه بشر
ولا شى غير ذلك
سمسم

-----------------------

قرأت التعليق اكثر من مره وتأملت كل حرف

لم اجدني الا أقرا ما اردت قوله

ولكن زينته بساطة اسلوبك واحساسك الجميل

سعيد جدا بوجودك وردك في بلوجي المتواضع

واتمنى متكونش اخر زياره :)

ليكوريكا يقول...

ازيك ياباشا
لحنا مليكة ولا شيطين ولا عيشين فى جنة ولا فى نار بس الجديد اننا الى بنحدد لنفسنا امتا نبقى فرحنين وامتى نبقى زعلنين
وعلى راى الى قال الدنيا دى عملة زى كباية الشاى انت الى بتحدد امتى تكون مرة وامتى تبقى مسكرة
وسلامى لكل حرف كتبتة
Reda

---------------------

منوره البلوج كالعاده يا ساحره
وجميل مثل كوباية الشاي ده
------------------------------
اكيد بتمر علينا اوقات كتير بنقدر نحدد احنا مين وعاوزين نكون ايه
لكن ساعات بنبقي اضعف من اننا نعرف حتى احنا مخلوقين ليه
اتمنالك تبقي دايما قادره تحددي انتي مين معاوزه ايه
وتقدري تتحكمي فعلا في كوباية الشاي

ليكوريكا

IceFox يقول...

قصيدة رااااااااائعة يا ليكو

بجد المرة دى انت تفوقت على نفسك

فلسفة الفكرة نفسها,أن الانسان هو

الانسان فى كل زمان.فيه نوازع

الخير,ودوافع الشر,وأيهما يتغلب

فذلك هو الانسان.هو دائما متذبذب بين

لذات الجسد,ومطامع الروح فى


العلو,أحيانا يدنو من هذه,أحيانا

يدنو من تلك,ولكن يظل هو الانسان.كان

د/مصطفى محمود يقول فى احد كتبه ان

الانسان هو نتاج تلاقى شقين ,أحدهما

الجسد المصنوع من الطين ,والاخر

الروح المقتبسة من الذات

العلية,والنفس هى ما يتنقل بين هذين

الشقين ,تشدها اللذات الى الطين, و

ترفعها الروحانيات الى الذات

العلية,فأيهما اختارت فذلك هو الانسان

...................................

لست أدرى يقول...

الصراحه انا عاده بحب اقتبس اكتر جزء عجبنى وأثر فيه بجد
ومش بحب اقول جميله وشكرا وخلاص
بس الصراحه القصيده دى روعه
لدرجه انى اصلا كنت فاكراها بتاعه شاعر مشهور وانت منزلها
ونزلت لغايه اخر القصيده اشوف انت كاتب بتاعه مين

لقيت انت اللى مألفها

بصراحه الواحد بيفرح لما يشوف ناس بتوصل مشاعر كده

مع انى مش بحب امدح فى حاجه اوى كده بس الصراحه القصيده مؤثره جدااااا وفيها رنه جميله اوى

تسلم ايدك وتسلم مشاعرك

smska يقول...

جميييييييله اوي يا ليكو .. بجد دي من اجمل الحاجات اللي كتبتها
متميز كالعاده ..
تسلم ايدك ..
:))

دكتور بهــدوء يقول...

وااااااااااااااو
انا مش ملاك ولا اي حد ملاك
كلنا بشر
بس فينا م الملاك ويا ريت مايكونش فينا م شياطين

:)
جميل اوي

دواير يقول...

مش عارفة أقول ايه...أنا سعيدة جدا إني قريت الكلمات الرائعة دي.....بجد كلام من القلب....عجبتني أوي ..أنا مش ملاك....ومش شيطان ..أنا انسان ..عشان ربنا خلقني كده...رااااااااااائعة...
...بس واضح ان ده تأثير المذاكرة...بيقولوا ان الواحد بيبدع أيام الامتحانات من كتر الضغط...وبيتهيألي ..ضغط الدنيا كله كوم....وضغط اللي ما تتسمى صيدلة دي كوم تاااااااااااااني....ربنا معاك

قلب ينبض لله يقول...

جميله اوي اوي

بس جميلة بتاعتي دي غير جميلة اللي بيقولها الناس اللي جت عندك

كلامك جميل جميل جميل
عاجبني جدا جدا
ماشاء الله عليك

ان شاء الله ها اجي عندك تاني

الفرعونة العاشقة يقول...

وساعات كتير تلاقيه وحيد وسط النجوم واللحظه بتعدي عليه الف يوم وكانه مجروح زينا ... مش قلتلك كأنه واحد مننا


جميلة اوى الجملة دى
وطبعا الباقى حلو بدروا
بس دى جامدة جدا

اسلوبك روعة
وبجد مش كلام مراكبية
ولا كلام فى الهوا
بجدبجد جامد

تحياتى
الفرعونة العاشقة

كلمــــــــــــــــة حـــــــق يقول...

السلام عليكم

تعرف لية انت مش ملاك ولا شيطان لاننا بشر يعنى بنى ادمين بمعنى او باخر مختلفين فى كل شى بنعمل الشىء ونقيضة وهو دة الاختلاف او التميز عن الملايكة والشيطانين زى ماتقول احنا حلقة الوصل بينهم

ليكوريكا يقول...

ice fox :

منورني يا واد

عملت ايه في الاورجانك :)))

اكيد سعيد بردك وبتشريفك البلوح

بس ايه الكلام الكبير ده كله ؟

(فلفسه الفكره) مره واحده

علي كده انا بقييت فلفسووووووف كبير

نورتني يا محمد مره تانيه

متعملك بلوج انت كمان بقي:)

ليكوريكا يقول...

لست ادري :

لدرجه انى اصلا كنت فاكراها بتاعه شاعر مشهور وانت منزلها
ونزلت لغايه اخر القصيده اشوف انت كاتب بتاعه مين

لقيت انت اللى مألفها


---------------------------------

تؤ تؤ

صدمه !

كده هتخليني ازعل منك يا حسناء

بقي كنتي فاكراها بتاعة شاعر مشهور

ولما شفتي انها بتاعتي مصدقتيش نفسك ؟

وااااااااااااااااااااااء

وكمان

واااااااااااااااااااااااااااااااء

طب منا شاعر مشهور وزي الفل أهو

دا حتى مفيش حد فقي (قوضتي) ميعرفش اني شاعر وبكتب شعر وقصص وببيع ترمس كمان

..............................

ماشي يا حسناء لولا الكلام الجميل اللي انتي قلتيه عن القصيده
كان زماني دلوقتي
(عضيتك) ...

آل شاعر مشهور آل

دنا حتى مفيش مني اتنين :)

نورتي البلوج يا حسناء ... البلوج بلوجك

ليكوريكا يقول...

جميييييييله اوي يا ليكو .. بجد دي من اجمل الحاجات اللي كتبتها
متميز كالعاده ..
تسلم ايدك ..
---------------------------

سمسكا اغني عضوه في منتديات شبابنا

مشرفاني بنفسها

يادي النور يادي الهنا

كويس انك جيتي عشان اشهد عليكي حسناء

بتقول عليا مغمور يا ساره :)))

انا هسيبك عليها بقي

وانا عارف انك ممكن تخلي (كلية هندسه) ثانويه في مصر :)))

منوره يا سمسكا

ليكوريكا يقول...

مش عارفة أقول ايه...أنا سعيدة جدا إني قريت الكلمات الرائعة دي.....بجد كلام من القلب....عجبتني أوي ..أنا مش ملاك....ومش شيطان ..أنا انسان ..عشان ربنا خلقني كده...رااااااااااائعة...
...بس واضح ان ده تأثير المذاكرة...بيقولوا ان الواحد بيبدع أيام الامتحانات من كتر الضغط...وبيتهيألي ..ضغط الدنيا كله كوم....وضغط اللي ما تتسمى صيدلة دي كوم تاااااااااااااني....ربنا معاك
------------------------------

اولا لان دي اول مره تدخلي في بلوجنا المتواضع

ولانك من (المعذبين في الارض) ... الصيادله يعني

ولانك كمان لسه بتدرسي اوجانك لحد دلوقتي

يبقي لازم ليكي (سلام ليكوريكي) مثلث ... مع العلم ان اللي بيدخل البلوج هنا مبيخرجش

يعني كده كده هتيجي تاني وتزورينا من وقت للتاني

سعيد انك الكلمات عجبتك ويارب يوفقك ويوفقنا في الامتحانات يارب

ليكوريكا يقول...

Blogger دكتور بهــدوء said...

وااااااااااااااو
انا مش ملاك ولا اي حد ملاك
كلنا بشر
بس فينا م الملاك ويا ريت مايكونش فينا م شياطين

:)
جميل اوي

----------------------------------

دكتور بهدوء

ايه الدوشه دي كلها :)))

منورني يا اجمل دكتور في بلوجات مصر كلها

يارب نبقي بس بني آدمين بمعني الكلمه

وبلاش ملايكه وبلاش شياطين

منور البلوج كالعاده :)

ليكوريكا يقول...

Blogger قلب ينبض لله said...

جميله اوي اوي

بس جميلة بتاعتي دي غير جميلة اللي بيقولها الناس اللي جت عندك

كلامك جميل جميل جميل
عاجبني جدا جدا
ماشاء الله عليك

ان شاء الله ها اجي عندك تاني

-------------------------------

اتمنى فعلا جميله بتاعتك تكون من القلب ومتبقاش مجرد مجامله زي المعتاد

بس اللي هيأكد ده فعلا انك دي متكونش آخر مره تيجي عندنا فيها هنا

تحياتي ليكي :)

ليكوريكا يقول...

وساعات كتير تلاقيه وحيد وسط النجوم واللحظه بتعدي عليه الف يوم وكانه مجروح زينا ... مش قلتلك كأنه واحد مننا


جميلة اوى الجملة دى
وطبعا الباقى حلو بدروا
بس دى جامدة جدا

اسلوبك روعة
وبجد مش كلام مراكبية
ولا كلام فى الهوا
بجدبجد جامد

تحياتى
الفرعونة العاشقة
--------------------------------

منوره البلوج يا (كليوباترا) واكيد كلامك مش كلام مراكبيه ...

الفراعنه كلمتهم متنزلش الارض ابدا
سعيد ان الاسلوب عجبك واتمنى متبقاش اخر زياره لبلجنا المواضع :)

ليكوريكا يقول...

كلمــــــــــــــــة حـــــــق said...

السلام عليكم

تعرف لية انت مش ملاك ولا شيطان لاننا بشر يعنى بنى ادمين بمعنى او باخر مختلفين فى كل شى بنعمل الشىء ونقيضة وهو دة الاختلاف او التميز عن الملايكة والشيطانين
زى ماتقول احنا حلقة الوصل بينهم

-----------------------------------

وعليكم السلام

فعلا محتاجين نعرف كل ده
لان لو كل واحد فعم انه مجرد بشر ومجرد انسان
اكيد في تصرفات كتير هيغيرها
منوره البلوج يا كلمة حق
تحياتي ليكي :)

لست أدرى يقول...

كده يا نبييل؟؟

وانا بقول فيك كلمتين حلوين تقولى اعضك؟؟؟؟
انا مش هعمل فيك حاجه

هسييب الفايتو والفارما هما اللى يتصرفو معاك

وبتشهد عليا ساره؟؟؟؟
ام تانيه ثانوى مش شهاده فى عمان
وكمان عاوز هندزه تبقى ثانويه

مكنش العشم

لست أدرى يقول...

كده يا نبييل؟؟

وانا بقول فيك كلمتين حلوين تقولى اعضك؟؟؟؟
انا مش هعمل فيك حاجه

هسييب الفايتو والفارما هما اللى يتصرفو معاك

وبتشهد عليا ساره؟؟؟؟
ام تانيه ثانوى مش شهاده فى عمان
وكمان عاوز هندزه تبقى ثانويه

مكنش العشم

ليكوريكا يقول...

لست أدرى said...
كده يا نبييل؟؟

وانا بقول فيك كلمتين حلوين تقولى اعضك؟؟؟؟
انا مش هعمل فيك حاجه

هسييب الفايتو والفارما هما اللى يتصرفو معاك

وبتشهد عليا ساره؟؟؟؟
ام تانيه ثانوى مش شهاده فى عمان
وكمان عاوز هندزه تبقى ثانويه

مكنش العشم

---------------------------

هههههههههههههه

لا ورده مرتين

فيها ايه يعني لو هندسه بقت ثانويه عامه يعني :)

وبعدين متخافيش اوي كده ... ليكوريكا المصل بتاعه 66 حقنه مش 21 بس

وبعدين انتي اللي بدأتي

آل شاعر مشهور آل :)))

كاميليا يقول...

الله عليك

أما جميلة بشكل

انا قرأتها اكتر من مرة

فيها موسيقى جميلة

وثقة وعند وأمانه وصراحة

يا الله

انا احييك جدا على البراعة دى

دى اول زيارة
واسعد زيارة ليا النهاردة فى المدونات
لاكتشافى مدونتك
طبعا بفضل زيارتك




تحياتى واحترامى

ليكوريكا يقول...

الله عليك

أما جميلة بشكل

انا قرأتها اكتر من مرة

فيها موسيقى جميلة

وثقة وعند وأمانه وصراحة

يا الله

انا احييك جدا على البراعة دى

دى اول زيارة
واسعد زيارة ليا النهاردة فى المدونات
لاكتشافى مدونتك
طبعا بفضل زيارتك




تحياتى واحترامى

------------------------

اكيد برضو انا من اسعد الناس دلوقتي وانا بقرا الكلام الجميل ده

ومن حد اكيد بيفهم في الشعر والقصايد زي مشوفت اختياراتك في بلوجك

اتمنى يكون كلامك مش مجرد مجامله
متكونش دي اخر زياره هنا

تحياتي
ليكوريكا

just smile يقول...

يا ابني انت ايه دخلك صيدله بسي
حاول تستفيد من موهبتك دي
بجد تحفه وقريتها كتيييير
وهقراها تاني
واضح انه الامتحانات بتخليك تبدع
منتظرين جديد احساسك

أمير الهدوء يقول...

راااااااااااااااااائع
راااااااااااائع

بجد بجد جااااامد موت

انا في الاول افتكرتها اغنيه
لا دي فعلا اغنية

اغنية حياه

تقبل مروري
وردي السريع

مستحملتش اني اشوف الكلام ده ومش ارد

امتحنات بقى


تقبل مروري
وياريت تكون صديق ليه ولمدونتي
اخوك
امير مملكة الهدوء
احمد

غير معرف يقول...

يااااااااه .. دايما برد في الاول كده .. لازم اكون اول واحد نورك صح :)

.. وثاينا انا عارف انك محمد نبيل ..
ولا انت بتوضح للناس اللى كنت بتضحك عليهم بتقولهم ان اسمك ملاك ..

كنت قولي وانا هافضحك .. :))

كلام على بلاطة يقول...

مفيش ملايكة اليومين دول
لكن احنا بنى ادميين
صحيح مطحونين لكن بنى ادميين

كلمــــــــــــــــة حـــــــق يقول...

السلام عليكم

ليك عندى تاج تدبيسة ممكن تاخدة وتعملة لو فضيت اوكييييييييييييييية

عايش ولكن يقول...

بوستك جامد جدا
وكلماتك صادقه جدا
طبعا مش هنرضى الا اننا نكون بشر
تحياتى
علاء

FaceMoon يقول...

عجبتنى اووووووووووووى
اوى لحد بعد بكرة لا لحد اسبوع كمان
ولا اقولك شهر
بجد حلوة جدا انا مش عندى حاجة تانية اقولها ربنا يوفقك فى امتحاناتك تبقى طمنا عليك ياليكو

ليكوريكا يقول...

just smile يقول...

يا ابني انت ايه دخلك صيدله بسي
حاول تستفيد من موهبتك دي
بجد تحفه وقريتها كتيييير
وهقراها تاني
واضح انه الامتحانات بتخليك تبدع
منتظرين جديد احساسك

-----------------------------

سعيد جدا بوجودك في البلوج لأول مره

وانا برضو بسأل نفسي السؤال ده

ايه اللي دخلني صيدله؟ ؟ ؟

يكونش نصيبي :)))

نورتي البلوج وسعيد ان الكلام عجبك :)

ليكوريكا يقول...

أمير الهدوء يقول...

راااااااااااااااااائع
راااااااااااائع

بجد بجد جااااامد موت

انا في الاول افتكرتها اغنيه
لا دي فعلا اغنية

اغنية حياه

تقبل مروري
وردي السريع

مستحملتش اني اشوف الكلام ده ومش ارد

امتحنات بقى


تقبل مروري
وياريت تكون صديق ليه ولمدونتي
اخوك
امير مملكة الهدوء
احمد

-----------------------

شكرا ليك يا احمد بجد علي ردك الجميل ده

واستني بس الامتحانات تخلص وهتلاقيني مقيم عندك في مملكة الهدوء بتاعتك

انا بموووت في الهدوء اصلي :)

ليكوريكا يقول...

يااااااااه .. دايما برد في الاول كده .. لازم اكون اول واحد نورك صح :)

.. وثاينا انا عارف انك محمد نبيل ..
ولا انت بتوضح للناس اللى كنت بتضحك عليهم بتقولهم ان اسمك ملاك ..

كنت قولي وانا هافضحك .. :))

-------------------------------

اممممممممممممممم

وماله وماله :)

ليكوريكا يقول...

كلام على بلاطة يقول...

مفيش ملايكة اليومين دول
لكن احنا بنى ادميين
صحيح مطحونين لكن بنى ادميين

----------------------------

انا معاك ان مفيش ملايكه اليومين دول

بس بيني وبينك الشياطين كتروا اوي

ربنا يحفظنا ويخلينا بشر زي محنا بنغلط ونتوب

نورتني ويارب متكونش اخر مره :)

ليكوريكا يقول...

كلمــــــــــــــــة حـــــــق يقول...

السلام عليكم

ليك عندى تاج تدبيسة ممكن تاخدة وتعملة لو فضيت اوكييييييييييييييية

-------------------------------

تاج الماظ ...

احمدك يارب :)))

ان شاء الله اول محس كده اني قادر اخد نفسي

هرد علي تاجك وتاج درش برضو

------------------------

علي راي المثل

(ليكوريكا لما بيسعد ... بيجيله تاجين مره واحده :) )

ليكوريكا يقول...

عايش ولكن يقول...

بوستك جامد جدا
وكلماتك صادقه جدا
طبعا مش هنرضى الا اننا نكون بشر
تحياتى
علاء

--------------------------

منور البلوج بجد يا علاء

سعيد ان البوست عجبك

واتمني تكون صديق دائم لينا

ليكوريكا

ليكوريكا يقول...

FaceMoon يقول...

عجبتنى اووووووووووووى
اوى لحد بعد بكرة لا لحد اسبوع كمان
ولا اقولك شهر
بجد حلوة جدا انا مش عندى حاجة تانية اقولها ربنا يوفقك فى امتحاناتك تبقى طمنا عليك ياليكو

------------------------------

منوره البلوج يا وجه القمر

بجد سعيد ان البوست عجبك

واجمل هديه هيا الدعوه الجميله اللي دعيتيها دي

ربنا يوفقنا كلنا يارب

دعاء مواجهات يقول...

ترف ياواد ياليكوو انا كاتبة قصيدة اسمها لست ملاكا

قريبة من بتاعتك دى يمكن توارد افكار مش عارفة بقى بس اوعى تفتكرنى سارقاها منك
عموما هنزلها قريب عندى ابقى شوفها واحكم

ربنا يوفقك وتجيب تقدير عااالى

سلاااام

ليكوريكا يقول...

ترف ياواد ياليكوو انا كاتبة قصيدة اسمها لست ملاكا

قريبة من بتاعتك دى يمكن توارد افكار مش عارفة بقى بس اوعى تفتكرنى سارقاها منك
عموما هنزلها قريب عندى ابقى شوفها واحكم

ربنا يوفقك وتجيب تقدير عااالى

سلاااام

-----------------------------

منوره البلوج يا دعاء

واكيد انا مستني اشوف قصيدتك

اللي اكيد يعني هتكون احسن من دي بمراحل

انا بكتب مجرد مشاعر

لكن انتي بتكتبي في الدستور


هناك فرق :))

منوره البلوج واتمنى متكونش اخر زياره

وانا اسف لعدم زيارتي المدونات باستمرار عشان فترة امتحانات بقي وربنا ميحكم علي حد

تحياتي ليكي مره تانيه