الجمعة، 5 ديسمبر 2008

جنه واحده وألف دنيا !



الصراخ لا يفيد ... والسكون كذلك ، الكراهيه مميته ... والحب قاتل ، الفرح احساس صادق ... والحزن اصدق .
والحيره هي المايسترو المجهول الذي يتحكم في عازفي الحياه أمام الجمهور ،
تظهر جميله انيقه في أعين (السمّيعه) مرهفي الحس
، وتظهر قبيحه ممله في آذان نفس السمّيعه، لمجرد ان محرك الرأس أصابه الصداع ولو لساعه واحده .

وبين ايادي الحيره تتوه الأحلام ، تصبح الرؤيه غير واضحه ، وتصبح الدنيا اكثر عراءً أمام الجميع ،
و الدنيا المرأه الوحيده التي اذا تعرت ... يفر منها الجميع ... الرجال والنساء علي حد سواء !

كذلك الحقيقه مثل الدنيا ، كلاهما ضائع ... ونحن كذلك ضائعون ... بين حقيقة الدنيا وبين دنيا الحقيقه !

وهنا امام الجمهور يظهر بطل القصه ... بطل المسرحيه ... بطل الدنيا ...
البطل الذي صُنع من طين ... ليعود اليه ، وعاش النور فيه ... ليغادره ، وجائه الحب ... ليفارقه .

ويظهر الجمهور متأثراً بما يشاهد ، البعض يبكي بحرقه ، والبعض يتعاطف مع بطلنا ، والبعض يترك القاعه ويغادر الي مسرحيه اخرى ، والبعض مهتم بالجمهور اكثر من اهتمامه بالمسرحيه ، والبعض منهمك في الكلام عبر الموبايل ويتفنن في الشوشره علي الجميع ، والبعض يأكل اللب بشراهه متناسيا ارشادات الطبيب والنظام الغذائي والضغط والسكر بل والدنيا كلها !

كل هذة الاصناف لا تهمني في شيء ، ولكني وقفت كثيراً عند رجل شعره مجعد له اعين مختلفه ، لا ينظر امامه ... ولا حتى خلفه ، لا يلتفت عن يمينه ... وكذلك يساره ، رجل تظهر علامات الحيره التي تحدثت عنها علي وجهه ،
فبينما البطل منهمك في خداع الجميع ، اجده ثاقب العينين ... شديد التركيز ، وكانه يرى شيء آخر غير البطل وغير المسرحيه وغير الجمهور ، يضحك بشده عند المشاهد المبكيه ، ويبكي كثيرا اذا سمع نكته حتي وان كانت (بنت نكته) كما يقولون !

هل الرجل منفصل عن الحقيقه ؟ ... أم هو الوحيد الذي يراها ؟

يقولون ان الاحلام تبدأ كبيره ثم تبدأ في التلاشي رويدا رويدا ، وهو يقول انها كانت صغيره ولكن لهفتنا جعلت منها اسطوره .

هل البحث عن الشيء يزيد تعلقنا به ؟ ... ام نحن متعلقون بالاشياء حتى وان كانت معنا !

وهناك من يرى في السماء مرآه وفي الشمس مصباح ، وفي تعانق الشمس بالبحر مشهد عاطفي مثير ، وفي الرجل الذي يحتضن ولده بحراره مشهد يستحق التوقف عنده وتصويره ان امكن ، فالطبيعي ان تعجب بالقمر في شدة الظلام ، وتنحني امام الاختراعات الحديثه وان كان فيها هلاكك ، وان تثيرك المرأه ذات الرداء الذي يجعلها اكثر عراءً ، وان تبكي حينما يموت بطل قصتنا ، وتصفق بشده حينما تكتشف انك (غبي) في نهاية المسرحيه وتجده يخرج ليحيي الجمهور !

اما غير الطبيعي ان ترى ما تراه بالفعل ، وتشعر ما تلمسه ، وتسمع ما تسمعه ، وتتذوق ما تأكله وتشربه ، وتشم ما تشمه ، نعم هذا غير الطبيعي ، وهذا ما يفعله الرجل صاحب الشعر المجعد وهذا ما لفت انتباهي إليه .

الوهم يجمل الحقيقه كالرداء الاسود الذي يفتنني حينما ترتتديه امرأه بيضاء على غير العاده ،
ونحن نعيش غارقين في الوهم ... وندعي اننا نبحث عن الحقيقه ، ونخجل كثيرا عن ان ننزع الرداء عن الدنيا لنرى قبحها في الظلام والنور علي حد سواء !

هذه هي دنيا الحقيقه ... فماذا عن حقيقة الدنيا ؟

اقتربت من الرجل وسألته : ماذا عن الدنيا يا صاحب الشعر المجعد ؟
لم ينظر الي واكتفى بابتسامه تبدو عميقه ، رفع يده اليمني ووضعها على رأسه ، ووجدته ينزع شعره المجعد لتظهر رأسه خاليه من الشعر تماما ...
وقال لي في هدوء ...

انت تراني مميز بشعري المجعد وتظن انها حقيقه ، وها انت قد رأيت حقيقة الحقيقه ،
تأمل ما تراه ، اسمع ما تسمعه ، تذوق ما تأكله ، استنشق ما تشمه ، واستشعر ما تلمسه
واعلم ان الدنيا ربما تكون اكثر قبحا من الحقيقه ... وربما تكون حقيقة قبحها سر جمالها .

الذهول جعلني مرغم على الصمت ، ولكني بادرته بالسؤال :

وماذا عن الجنه ؟؟؟

قال: هناك الف دنيا ان اردت ... دنيا جميله ، دنيا قبيحه ، دنيا قاسيه ، دنيا ممله ، دنيا فارغه ، دنيا مزدحمه ، دنيا تحبها ، دنيا تبغضها ، دنيا تسعى اليها ، ودنيا تهرب منها ... تستطيع الدنيا ان ترتدي كل يوم رداء جديد ، ربما يكسوها وربما يجعلها اكثر عراءً ...
ولكن لا يوجد سوى جنه واحده ، لعلنا نرى حقيقة الدنيا حتى نصل اليها .

تمت 5/12/2008

محمد نبيل الدمرداش .

الأحد، 30 نوفمبر 2008

اعطوني الشمس !





الساعة الآن
بعد العشاء بزمان
والفجر يحارب صمت الليل
والنوم الأشبه بالغثيان !

وظلام العين ينادي النور
والحزن القاتم فوق الأرض
يعطينا الفرحه ... كالاحسان !

والسحب البيضاء المملوءه
بمياه العدل ...
انتحرت عند جبال الظلم
وامتلأت بمياه الأحزان !

والمطر النازل فوق الأرض
يسكرني ...
ودموع العين ...
تحاول ان تحيي السكران !

أذان الفجر يناديني ...
وانا اشتاق ...
لمزيد من أصوات الخلق
وكأني ادمنت الانسان !

واهرول رغم فضاء الشارع
وكلاب الليل تحييني ...
وكأني اهرب بالحزن
من سهم العشق الولهان !

وانادي يا اهل العالم
يا موطن لظلام الظلم
يا صنبور الفرح التالف
يا دستور الاستيطان !

اعطوني الشمس لتحرقني
اسقوني من كأس الحب
وضعوا لي سماً يقتلني
وادعولي مغفرة الرحمن !

ليكوريكا
30-11-2008

الاثنين، 6 أكتوبر 2008

الحاره !




قالولي شايف ؟
قلت شايف ...
قالولي حاسس ؟
قلت يمكن ...
قالولي ايه رايك في دنيا ؟
قلت حاره ... وفيها نسكن !

بس حارة دنيتي
سكانها تعبوا ...
وعيالها غرقوا في شبر هم
وبناتها لابسين الهوا
ومعدش فيها شيء مهم !

وفحارتنا قصر عالي
فوقه في سجان كبير !
كل يوم ...
يحبس شروق الشمس
ويشتري منّا الضمير !

والقصر ليه ابواب كتير

باب لاحلامنا الجميله ...
تدخل ومبتخرجش منه !
وباب لطفل نفسه يكبر ...
سرقوا حلمه غصب عنه !

وباب لصوتنا ...
للكرامه والبطوله والكفاح
واللي راح ...
واللي روحنا فداه تروح
والجراح ...

كله ده عاملينله باب
قدامه عتبه ...
فيها مداس
بيدوسوا فيها برجلهم عالحقيقه
علشان تبان لينا سراب !

وحارتنا مش بس ناس
ولا حتى قصر وفيه مداس

حارتنا فيها قبور كتير
لجدود جدودي
ودموع خدودي
وللضمير !

وللأمانه ...
ساعات حيطانها بيدهنوها
ابيض وبمبي
والراديو اللي جوه قلبي
ساعات يدق !
والحق حق ...
ساعات كتير بدعي واقول
- يارب فرحه -
والفرحه تيجي ...
بس مفيش ليها مكان فاضي فقلبي !

لكني عايش ...
ومعيش فلوس اعيش فغيرها
وقلبي قلبي ...
والفرحه مهما تغيب فاكرها

والحاره عايشه ...
من غيري بيا مش هتفرق
يمكن اموت وكلامي يفرق !
او حتي اعيش في الحاره واصبر
وصبري يمكن هوا اللي يفرق !!!

ليكوريكا
6/10/2008
----------------------------------
اسف لعدم ردي علي الناس
بس باذن الله هحاول ارد عالكل
وانا بفضل اني ارد علي الناس في بلوجاتهم احسن
كل سنه وانتو طيبين
ليكوريكا

الثلاثاء، 30 سبتمبر 2008

عيد سعيد فكر جديد !

عيد سعيد علينا كلنا باذن الله

اتمنالكم السعاده والحب والتفاؤل

ويارب كل الناس تحقق امانيها

(عيد سعيد ... فكر جديد)

اضغط هنا


الخميس، 11 سبتمبر 2008

خلاص خلاص هكون بطل !


كلام كتير
وجعولي راسي يا جدع
والمشكله ...
ان المشاكل كلها
عاوزينني اقعد احلها
واكون بطل !!!
بطل بجد ...
يقول - كلامه يتسمع !

خلاص خلاص
ركز يا شعب ...
ويايا اصلي هنقذك
من اي شيء هينرفزك !

منا بطل ...
ونصبوني فوق الجبل ...
اللي نزل من فوقه صخره
وياريتها صخره صغيره
زي اللي بيها بيتقفل ...
علينا قبر ...
وبنتدفن !

ياريتها صخره صغيره
متدحرجه من فوق جبل
تنزل وتوصل حيّنا
وتقف طابور زينا

واما الآدان في المغربيه
ينادي --- تيجي ...
وتبل ريقها ببق ميه
والميه تطلع صرف صحي
مش معدنيه !

ترفع ايدها تشتكي
للي خلقها مننا
وتقول يارب
اني صايمه ... اني صايمه !

ياريتها صخره صغيره
يبنوها حيطه ...
تداري خوفنا وحزننا
ونستخبي مالبرد فيها
والشمس تدخل عندنا !

ياريتها صخره صغيره
يقدر شبابي يهزها
وصوابعي تقطع جلدها
واشيلها من فوق صدرنا
ويا الهموم اللي ماليه قلبنا
وبصرخه مني تتفزع
ترجع هناك فوق الجبل
منا بطل !!!

ركز يا شعب ...
لتاني مره بحذرك
دنا البطل اللي جاي ينقذك
من الصخور ...
ومن الطابور ...
واي شيء هينرفزك !!!

متدققوش عالكلام اللي بقوله
منا خوفي انكو تفهموا
ولو فهمتوا ... تتكلموا
اصل انتو ايه ؟
حبة بشر ؟؟؟
هههههههههههه
ضحكتو قلبي :)
اصل البشر
في بلاد بعيده مش بلدنا
رخاص اوي زي المطر !!!

تمت
ليكوريكا
11-9-2008
----------------------------------
اللي مش فاهم حاجه يقرا البوست ده
اضغط هنا
بعنوان مش مستعد اكون بطل
ويقرا ردود الناس
ويعيش معانا
واكيد هيفهم !
كل رمضان وانتو بخير
ليكوريكا

الجمعة، 5 سبتمبر 2008

مش مستعد أكون بطل !




مش مستعد
مش ضعف مني
او حتي بعد ...

مش مستعد
صدقوني مش هزار
كلامي جد ...


مش مستعد اكون ورق
مكتوب عليه حيره وقلق
وخوف مخيف
وخوف يخلي كلمتي
تهرب ...
تضيع ...
او تتحرق !

مش مستعد اكون ورق

مش مستعد اكون طريق
فيه ناس بتمشي عالقلوب
وناس بتغرق في الذنوب
وناس تتوه ...
برغم ان حلمهم
واضح اوي وسط الطريق !

مش مستعد اكون طريق

مش مستعد اكون مطر
ينزل ويغرق في التراب
والزرع يتخانق عليه ويا البشر

واسيب مكاني في السحاب
فوق البيوت ...
علشان اموت ...
او حتي علشان اتقتل

وارجع
وارجع بخار ...
واضيع واتوه بين الضباب
وانتحر ... !

مش مستعد اكون مطر

مش مستعد اكون بطل
في روايه اللي كتبها خايف تتقري
او خوفوه ...
او خوفوا اللي قراها
ليمسكوه ...
قاعد بيقرى في قصتي
قصة بطل ...
قصة بطل كتب التاريخ
ومهمهوش
انه يكون حبة كلام
دلوقتي خافوا يكتبوه
او يقروا عنه !

بيخافوا منه ؟
بيخافوا منه ولا عليه ؟
بيخافوا ليه ؟

ومهما كان صعب الجواب
مش مستعد اكون بطل جوا كتاب
عالرف خايفين يفتحوه ...
او يقروا فيه !

صدقوني احسنلي اتقتل
ولا اني يوم اكون بطل ...

مش مستعد اكون بطل !

مش مستعد اني احب
واكتب كلام بين الورق
يفتح طريق للعشق فوق ارضنا
واعشمك ...
ان المطر بكره هينزل عندنا
وتحبي فيا
واحب فيكي
وفي النهايه أكون بطل

لكن بطل ...
مش مستعد يكون بطل !

ليكوريكا
5-9-2008

السبت، 9 أغسطس 2008

يرحلون من اجل الحياه !


يرحلون من اجل الحياه




طفله بلا ملامح ... ربما تشبهني وربما اشبهها ... ربما تعرفني وربما لا ...
احبها ... نعم احبها ... وكم تمنيت ان أراها قبل ان ترحل ... وكم تمنيت ان ارحل كي أراها ...

ولكن لماذا جاءتني اليوم في حلمي ... وانا لا اجيد احلام النيام ؟
ولماذا هى ، وهي بالذات وفي هذا التوقيت ؟

هل جاءت لتذكرني بحقيقة دنيانا الوحيده ؟ ، ام جاءت لتخبرني انها تعرفني ؟ ، ام هو مجرد حلم خالي من التفسيرات ... كمعظم الاحلام التي لا احبها ولا حتى هي تحبني ؟

جبلٌ رمادي اللون ، في بلاد بعيده ، يظل صامت سنوات وسنوات ، لا يتكلم الا بهزات ارضيه عنيفه تنذر كل من حوله بان الصمت لن يطول ، وانه سوف يقول كل ما بداخله مره واحده ، وما بداخله ليس مجرد كلمات ، انها حمم بركانيه حمراء ساخنه ، كدمائنا التى تجري فينا ، هي الغضب الذي تحمله الارض لكل من عليها ، هي ثورة الصمت او لنقول هي صمتنا الثائر في اعيننا ... فلا نحن نطقناه ، ولا هو ظل صامتا كما عهدناه ...
تخرج الحمم في عنف وتزحف علي الاراضي الاخضر منها واليابس ، تزيل كل ما عليها وتبقى هي ، تزيل الكراهيه والحب على حد سواء ... تزيل الهموم والسعاده في وقت واحد ...
انها لحظة سكون لا تملك الا ان تسكت فيها ... لحظه تُمحى فيها الحياه ... !

ولكن ماذا بعد كل هذا ؟
يعود الصمت الى المكان والارض ليست كما هي ... فقد عادت الي البدايه ... عادت كما خلقت اول مره ، عادت لتبدأ الحياه ... عادت الي الحياه ... !
البركان جعلها من اخصب الاراضي وترك لها ارثا ثمينا من العناصر والمركبات تتمناه كل الاراضي الاخري ، فالحمم البركانيه قتلتها لتحييها ... فالموت فيها هو سر الحياه !

ومن الصمت السائد في ارضي الوليده الي صخب وصراخ ، الي لهفه وترقب ، الي امل نتمنى ان يولد وننتظر ان نعانقه كما نعانق من نلقاهم بعد طول غياب ...
رجل عهدناه ان يلبس بالطو ابيض ويتمتع ببرود قطبي لا مثيل له في ارضنا العربيه الدافئه ، يخرج ويضع لنا معادله رياضيه رغم انه لا يجيد الرياضه ولا يعرف عنها الا القليل ...
معادله طرفيها متساويين ولكنهما متضادين تمام التضاد ، يخيرنا بين الموت والحياه ... او بمعني ادق ... جعل الموت شرطا للحياه !
فهو يخيرينا بين الام ووليدها ... حلمها الذي لم تراه ... يخيرينا بين المستقبل والحاضر ... يقتل الامل ليبقي علي غيره ... انه يقول ان
(الموت هو شرط الحياه) !

وبعد ان يسود صمت آخر ... نعود ولكننا الان علي جبهه من نار ... نار تحرق كل شيء ... مدافع موجهه نحو الموت ... وطائرات اقلعت من اجل الموت ... شباب يخرجون من ديارهم ... يودعون احلامهم من اجل احلام الاخرين ، حرب لا تتوقف ... من اجل الحريه ، من اجل الحق ، من اجل الكرامه ... حرب الموت فيها ليس ببعيد ... ولكنه موت من أجل الحياه !

اما عن طفلتي ... فهي نهى ... اختى التى لم اراها ... ولم اعانقها واعاندها ... ولم اعلم عنها شيء سوى انها من اهم اسباب وجودي ... لقد رحلت قبل ان اولد ... رحلت بعد حياه لم تستمر أكتر من اسبوع ... رحلت لتترك الدنيا لطفل آخر ، لو لم ترحل لكانت فرص وجوده في هذه الحياه ضئيله او شبه معدومه ...
رحلت ككل من رحلوا ... لنتذكرهم ... لنحزن علي فراقهم ونتمني ان نكون جوارهم ، رحلت كمعظم من يرحلون ويتركوننا ، لنشعر بالوحده من بعدهم ونتألم بدونهم ... يرحلون ليذكروننا باننا سنرحل الي حيث لا نعلم ... وحيث كانوا لا يعلمون !

رحلت وتركت ابتسامه على وجهها فهي في الجنه حيث الهدوء والامان ، حيث تستقر احلامنا حينما نمل من الدنيا وما فيها ، هي في الجنه حيث نتمنى ان نكون !

هي ككل من رحلوا ... حمم بركانيه تتركنا اكثر نقاءا وصلابه ... تتركنا وحدنا بلا حياه ... تتركنا من اجل الحياه !
هي ككل من رحلوا ... يذكرونا باننا داخل دائره مغلقه ... معادله محسوبه ... طرفها الايمن هو الموت ... وطرفها الايسر هو الحياه !
هي ككل من رحلوا ... يرحلون من اجل استمرار الوجود ... يحاربون من اجل الموت ... ويرحلون من أجل الحياه !

ليكوريكا

بالنسبه للواجبات اللي جاتلي انا حليتها علي البلوج التاني

أحلام مع ايقاف التنفيذ !



الأربعاء، 23 يوليو 2008

هوا ايه الحب ؟

كالعاده مقداميش غير اني اكرر اعتذاري
وخصوصا للواجبات اللي جتلي ولسه مجاوبتهاش
بس بجد يمكن انا مش مصدق اني قاعد علي جهازي دلوقتي؟
عموما باذن الله هحل الواجبين اللي جولي علي بلوج
(احلام مع ايقاف التنفيذ)
وهسيبكم مع حاجه من البوم ليكو 2007
اسمها
هوا ايه الحب ؟
يارب تعجبكم :)





هوه ايه الحب ؟!

هوه ايه معناه

هوه دقة قلب

ولا هوه حياه


هوه انك تبقي جنبي

بس برضه تكون واحشني

واما تبعد عني لحظه

يبقي كل الكون ناقصني


هوه انك تبقي ليا

كل عمري ليك شويه

لو هتطلب يوم حياتي

خد حياتي ونور عنيا


هوه طفل جميل مابيننا

اتولد لما اتقابلنا

لو هنبعد هيناديلنا

بالغرام يجمع مابيننا


هوه كلمه قلتهالك

والجواب شفته فعنيك

صوت سكوتك ببقي سامعه

من بعيد بلمس ايديك


هوه شوقي لحضن قلبك

حلمي بيك بتضمني

هوه قبل مقول بحبك

تبقي انت سمعتني


هوه لما النور بيرحل

تبقي شمسي وتبقي قمري

مهما يجري ومهما يحصل

مستحيل انساك ياعمري


هوه ايه الحب

هوه ايه معناه

هوه دقة قلب

ولا هوه حياه ?




السبت، 12 يوليو 2008

كلمه واحده !


في البدايه بس يا جماعه انا عاوز اعتذر للناس كلها علي اني مقصر في الزيارات والردود ، بس بجد والله يا جماعه بسافر كل يوم وظروف قعادي في البيت بقت مش بايدي خالص ، اتمني تعذروني وباذن الله هحاول علي قد مقدر اكون عندكم في اقرب وقت

ليكوريكا


كلمه واحده!

كلمه واحده
بس مستنيها منك
كلمه سهله
طب ليه صعب أسمعها منك

كلمه وحياتي فداها
كلمه نفسي أعيش معاها

كلمه كل اللي ما بينا
يبقى فيها
لو تمنها يبقى عمري
أشتريها

كلمه حلوه
تخلي معنى الحب
يكبر
كلمه صافيه
نحس فيها الكون ونسهر

تهزم الدمعه في عينينا
تقتل الآهه في جفونّا
توصل الفرحه بماضينا
يبقى بيها العمر جنّه

كلمه بيها الكون جميل
تلغي كلمه مستحيل

كلمه ومعيشني فيها
شوف في قلبك هتلاقيها

بس قولها ...
كان حياتي تبقي نور من بعد نار
كنت أعبر بيها سور
أو100جدار

قولها يا حبيبي هتقدر
أنت قلبك زي قلبي
ويمكن أكتر

قولها مره مش هتندم يوم عليها
قولها واللهِ انت حاسس زيي بيها
قولها وانت بتبكي زيي من الغرام
قولها حتى وانت مش لاقي كلام

قولها لما تفتكرني
قولها وانت بتبتسملي
أو بتضحك
يا حبيبي قول بحبك!

ليكوريكا

--------------------------

شوف وقفه مصريه

بلوج

http://lekorika.blogspot.com/

(احلام مع ايقاف التنفيذ)

السبت، 5 يوليو 2008

جوا مني ... جوا منك !



جوّا منك
وجوّا مني
سر الحياه

جوّا منك
وجوّا مني
فرحه وآه

جواك كلام
مليان آلام

جواك حنين
جواك غرام

جواك سكون
مالي العيون

جواك صراخ
جواك جنون ؟

جواك امل
جواك حاجات بتتقتل
وحاجات كتير بتعيش سنين
مع انها ...
حاجات لا يمكن تكتمل !


جواك كلام خايف تقوله
وكلام كتير ...
نفسك تقوله
وكلام لقيتك جاي تقوله

مع اني حاسس ...

ان الكلام اللي انت قلته ...
وسمعته منك ...
مش جوا منك !

شايف دموعك
مع ان وشك مبتسم

عمال بتضحك
بتضحك ...
بتضحك ...
والضحك غرقان في الألم

والفرحه جواك
طريق مليان ورود
بس الربيع حالف
يغيب ولا يوم يعود !

والحب قصه
بطلها مش سعيد
ومش بعيد ...
ان النهايه
تكون الم ...
ودموع بتخرج مالوريد !


انا بحكي عن حبة حاجات
سمعتها برغم السكات
اللي ملينا ...
لكن عنينا ...
حلفت تبوح بكل شيء
كان جوا مني ...
وجوا منك !

-----------------------------------

شوف بوست
ليكوريكا بايظ ايديشن!
دلوقتي علي بلوج
http://lekorika.blogspot.com/
احلام مع ايقاف التنفيذ!

السبت، 28 يونيو 2008

التوبه مش للميتين !


محتار انا ...
حاسس كأني مش انا
ولا حتي همّا زي همّا


حتي السطور ...
اللي الكلام غرقان تملي فبحرها
شايفها ليه وكأنها ...
ترعه فبلدنا
والناس عليها ... عاملين هالُمّا

والحروف واقفين طابور
مستنيين ...
مستنيين الكلمه تيجي
ومش بتيجي !
اصل الكلام واقف في زورنا
مستني يمكن ييجي دورنا
ويسمحولنا ...
نقول وننطق ...
بالحاجات والمحتاجات
جايز نقول حاجه مهمه !

عارفين انا لو كنت حرف هعمل ايه ؟
كنت اتكتبت ...
كنت اتكبت ولو لوحدي
فصفحه فاضيه ...
مفيهاش كلام يقلب دماغي
وكفايه اني ...
اتقري
واتنطق
ويصرخوني
ويهمسوني
ويخافو مني ... فيمسحوني !

لكن انا ...
خلاص بقيت
صوره وصوت

ومهما حاولوا يمسحوني
ويقتلوني ... فوق الورق
مش هموووت !


عارفين انا لو كنت حرف هعمل ايه ؟
كنت اتكتبت ولو لوحدي
فصفحه فاضيه ...
مفيهاش كلام يقلب دماغي
ولا صوره خايفه تترسم
ولا سطر خايف مالقلم ...
ليدوس عليه ...
وهعمل ايه ...

اصلي اتخنقت من السكات
ومن الحروف ومن البشر
ومن الحاجات ...
اللي ياما حلمنا بيها
وعشنا فيها
ومن كلامنا عالقدر

هوا القدر ...
هوا اللي خلى البشر
واقفين طابور زي الحروف
جواها خوف ...
مستنيين الكلمه تيجي
ومش بتيجي ؟

ولا القدر ...
هوا اللي خلانا صور
عالرمل خايفه تترسم
مع انها كانت زمان
بتبتسم ...
برغم موال الألم
اللي زمان كان برضو فينا
وكان ملينا ...

ولا القدر ...
هوا الي خلانا سطور
زي القبور
تفتح تملي قلبها
للميتين ...
والمقتولين ...
والمخروصين ...

والناس تجيبنا
علشان تسيبنا
وسط القبور
فوق السطور
اللي مفيش فيها كلام
وفي سلام !

بس سلام للميتين
والمقتولين ...
والمخروصين ...
وللحروف اللي كانوا واقفين طابور
وللصور وللسطور
وان كان سلامنا في القبور
خلوه يغووور
خلوه يغووور !

او حتي خلوه يتدفن
وسط التراب وسط العفن
ودموعنا تُبقاله الكفن
وصراخنا يبقاله ذنوب
ولو نتوب ...
التوبه مش للميتين
المقتولين ...
المخروصين ...

التوبه دايما للحروف
المكتوبين ...
المرسومين ...
المنطوقين ...
المصروخين ...

التوبه مش للميتين !

تمت
ليكوريكا

--------------------------------

شوف بوست
ليكوريكا في قاهرة المعز
علي بلوج
(احلام مع ايقاف التنفيذ)
exclusive :)
http://lekorika.blogspot.com/

الاثنين، 23 يونيو 2008

القلب فينا ... ولا احنا فيه ؟



اسمعني يمكن ...
الاقيك في شعري
وفكلمتين دابوا فمشاعري
وفسطر تاه بين الورق

اصل الورق ...
حواري ضلمه ...
بنمشي فيها بالكلام
وبتختفي فيها الآلام
وبتبتدي قصه غرام
ساعات كتير فوق الورق !

تسمحلي طيب اسألك ...
كام سؤال صغيرين ...
محتارين ومحيرين
قلوب كتيره زينا ...

اصلي لقيتنا كلنا ...
خايفين نواجه نفسنا
بالكام سؤال اللي انا
كتبتهم ...
بين السطور المحتارين
فوق الورق !

هوا سؤال ...
كان بس ايه ؟!

ايوه افتكرت ...

القلب فينا
ولا احنا فيه ؟

بنحب لينا ؟
بنحب ليه ؟

والكره لمّا ...
نلاقيه مالينا
قولّي طيب ...
كرهنا ليه ؟!


القلب يحلم
يرسم شراع
والحب مركب
والبحر ساع
كل القلوب ...
وكل المراكب ...
والمستحيل والمستطاع !

القلب شط
والميّه دافيه
والرمله فوقها قصور كتير
والحب مركب
عالشط راسيه
والموجه قاسيه ...
علي ناس كتير !


القلب دق
علشان يعيش ؟
ولا يعيش ...
علشان يدق ؟

القلب يفرح
يطير لفوق
يسرح ويسرح
وكله شوق
ومره واحده
تلاقيه بيبكي
واقوله انسى ...
يقوللي لأ !

القلب بيت
الحب بابه
والفرح فيه
وفيه عذابه
وناس بتسكن
وناس تحب
وناس تخون ...
وتقول صحابه !


فاكر انا سؤالي ايه ؟
اللي مفيش اجابه ليه ...

القلب فينا ...
ولا احنا فيه ؟!

بنحب لينا ؟
بنحب ليه ؟!

ليكوريكا
23/6/2008

-----------------------------------
فاصل اعلاني

خدلك لوك علي بلوج
"أحلام مع ايقاف التنفيذ"
http://lekorika.blogspot.com/
وشوووووووووف
(مطلوب صيدليه)
مع ليكوريكا ... لازم تفصل وصلة النت

:))

الجمعة، 13 يونيو 2008

أم ندى ... !




يا ام ندى
الشعر خايف يتكتب
احسن ميوصفش الدلال

ويقول كلام ...
مهوش حقيقه ...
ولا خيــــــــــال !
عارفه الخيال يا ام ندى ؟

الخيال فيكي حقيقه
والحقيقه ...
انتي أجمل مالخيال !

يا ام ندى
انتي الندى فوق الورود
يا ام ندى
انتي الحياه ... انتي الخلود!
يا أم ندى ...
انتي الايدين الطيبه
اللي بلمسه صغيره
تقدر تنسيني الوجود !

يا ام ندى
انتي الخطاوي الفرحانين
انتي الغرام ...
انتي الحنين !
انتي الهلال اللي بيضحك عالنجوم
ويقولهم ...
مالكم كده غيرانين ...
مني ومن بنتي ندى ؟!

يا ام ندى
القلب وياكي ابتدى
يعرف طريقه
ويفك ضيقه
ويبل ريقه
ويقول كلام رقيق أوي ...
زيك كده ... يا أم ندى !

أمّا ندى ...
بنتك وبنتي
خدت جمالها منك انتي
والقلب الابيض
والنني الاسود
والشقاوه والدلع
والشطاره في الحساب

والضحكه اللي ...
الكون بيضحك بعدها
حتي القمر ...
يموت ويسمع ضحكها
وقدمها خير زي السحاب !

يا أم ندى ...
احكي لندى ...
حدوته الشاطر "أنا"
وازاي انا ... بقيت هنا
ويا الايدين الطيبه ...
اللي بلمسه صغيره ...
تقدر تنسيني الوجود !

واما تنام ...
غطيها حب ...
واقري تملي فودنها
"الله أكبر"
"الله أكبر" من كل شيء
يئذيها أو يئذي أمها ...
ام ندى !

يا ام ندى ...
خليكي جنبي
في الحياه المتعبه
محتاج أوي ...
للإيدين الطيبه
اللي بلمسه صغيره ...
تقدر تنسيني الوجود

يا ام ندى
انتي الحياه
انتي الخلود

يا أم ندى ...
انتي الوجود
انتي الوجود !


تمت ...
محمد نبيل الدمرداش
12-6-2008

الجمعة، 23 مايو 2008

واحد وعشرين سنه ... عمري أنا !




واحد وعشرين سنه ؟
حاسبينها صح ؟
متأكدين ...
اني انا ...
عمري انا ...
واحد وعشرين سنه ؟

بتقولوا أه متأكدين
ماسكين قلم ...
قاعدين تعدوا في السنين ؟
جايبين سجل ...
مواليد كتيره ...
ارقام كتيره ...
اسماء كتيره ...
كان اسمي بينهم ؟

قالولي اه متأكدين ...
مش انت سين ابن سين ؟
اللي اتولدت في شهر يونيه
يوم سته / سته ؟
ومكان ميلادك اي حته ؟

ايوه انا ...
طيب مدام متأكدين ...
يبقي الغلط راكب جنابي
مع اني عارف اني انا
عمري انا ...
عمره مكان ...
واحد وعشرين سنه !

خلوني اعد ...
وعدوا بعدي
واوعاكوا لحظه تسرحوا
لو لقيتوا عمري قرن ...
واوعاكوا تجروا وتفرحوا
لو لقيتوا عمري يومين !


ياااااه
قد ايه لسه فاكر ...
ايوه فاكر من سنين

لما كنت لسه عيل ...
أيوه عيل ...
انتو ليه مستغربين ؟!

كنت بصرخ ... رجعوني
بس مين يسمع صراخ ...
طفل كان لسه نونو
يعني عنده يوم يومين ؟!

شربوني واكلوني
علموني وفهموني
حطو رجلي عالطريق ...
قالوا امشي ... قمت ماشي
قالوا اجري ... جريت أوام
علموني أقول كلام
علموني أكتب حروف
علموني أحب بلدي ...
مهما اسمع أو أشوف !

بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي
وابقي قادر ...
اني أكابر ...
مهما اكون ... تعبان حزين !

ايوه فاكر
لسه فاكر من سنين ...

لما كان عالضهر شنطه
وفي الايدين زمزميه
كان فيها ميّه ...
كنت بشرب منها لمّا اعطش شويه ...
واما تخلص ...
كنت برضو املاها ميّه

واما كان عليا واجب
وفي الكتاب خدت نجمه
واما كان ليا صاحب
وكنت اقوله كل كلمه

واما كان نفسي أكبر
ايوه كان الحلم وردي
كنت فاكر اني هقدر
مهما كان الصعب ... اعدي !

كنت بحلم ...
كنت برسم ...
كنت بكتب شعر برضو ...
بس عمره مكان حزين :(

ايوه فاكر ...
لسه فاكر من سنين

لما عدى العمر بيا
وسابني صاحبي
كان ساعتها مفيش معايا زمزميه
وفيوميها ...
بكيت عليا مش عليه ...

وكرهت فيه كل الصحاب
حتي الكتاب ...
اللي خدت فوسطه نجمه
كرهته برضو ...
اصله كان اسمه عليه
انه صاحبي
وكان بقولوا كل كلمه !

وفيومها برضو
لقيتني وسط الكون وحيد
بمد ايدي
بس كل الناس بعيد
شايفنني يمكن ؟!
عارفني جايز ؟!
بس الاكيد ...
ان محدش حس بيا
ولا حتى مد نص ايد !

واليوم ده بس
ابقوا احسبوه ... عشر سنين !

ايوه فاكر ...
لسه فاكر من سنين

لما دق القلب دقه
قمت افتح
قلت مين ؟
انتي كلمه عالسطور؟
انتي عالم كله نور ؟

طب اقولك انتي مين ؟

بس لازم توعديني متضحكيش ؟
ومهما كان وصفي (بلدي) ...
اغفريلي
اصلي انا بعدك اكيد مش هعيش ...

انتي ميّه ...
ايوه ميّه ...
بس مش في الزمزميه
اللي كنت زمان بشيلها من سنين

انتى ميّه
وقلبي ارضك
ايوه فيكي اكيد بدوب
كل مشرب بُق منك
تتغفر كل الذنوب !

وابتسامتك السماد
والملاوعه والعناد
هما روحك ...

اما طيبة قلبك ...
تبقي البذور !
انتي ميّه ...
والغيره فيها تخليها تفور !

انتو لسه معايا ولا نمتوا مني ...
اعذروني ...
الكلام ده كله اصله غصب عني
اصل انا حلفت احسب وبضمير
عمري كام من السنين ؟!

احسبو اليوم ده وحده
مليون سنه
بس عدوا عليا يمكن لحظتين !

اصلي فاكر
ايوه فاكر من سنين ...

لما شفت الحلم عاجز
والحب تاه بين الحواجز
والميه خلصت ...
بس فاضل نقطتين !

نقطه مره
زي طعم كل حاجه فارضنا
زي خوفنا لو يضيع يوم حلمنا
زي طفل بريء لقيته بيتقتل
وقالوا ان اللي قتل النخوه فينا
وداس علينا
ده صديق صدوق و مش عدونا !

ونقطه تانيه...
فيها سم
فيها هم
فيها دم

بيها مات الحب
بس سابلي جواب طويل
زي طول قصيدتي ديه

قاللي عيش اليوم بيومه
واوعى تحسب مره عمرك

واوعى تزعل ان قدرك
ان كل يوم يعدي ...
يبقي احلى ماللي بعده

وان اللي وياك النهارده
بكره جايز ينسى وعده !

قاللي سيب همك لربك
هوا عالم بالعباد
زي مالحزن فقلبك
فرحتك ليها معاد !

وفنهاية جوابه ...
ساب ليا وصيه
قاللي شيل زمزميه ...
بس مش تملاها ميه
املاها صبر... ولو شويه !

حسبتوا عمري ؟
عديتوا كام مليون سنه ؟
حسبتوا عمري ؟
ولا هوا يدوب يومين ؟!

واحد وعشرين سنه ...
عدوا كده من غير محس !
واحد وعشرين سنه ...
مستحيل ...
يبقوا كل عمري بس !

تمت / محمد نبيل

6/6/2008
عيد ميلادي الواحد والعشرين !

الخميس، 15 مايو 2008

أنا مش ملاك


أنا مش ملاك ...

أه مش ملاك !

وعشان اكون أمين معاك ...

انا مش شيطان ...


متبصليش وعنيك تكون مستغربه

اصلي منيش اراجوز ايديه في الكهربا

ولاني ماشي في الشوارع

وطولي فارع ...

وضهري حالف ينحني ...

مع انهم بيقولو اني راجل غني ...

انا مش غني !

ومش فقير ...

ومش ملاك ...

وهقول كمان ... انا مش شيطان !


بس انت ركز حبتين ...

لو كنت يعني ... تحب تعرف ابقى مين؟


عارف القمر؟

ايوه القمر ... بتاع حكاوي العاشقين

ابو ضي هادي ...

ابو نور جميل ...

ابو ليل ساعات بيكون طويل ...

وساعات نحسه ثانيتين ...


ايوه القمر ... اللي هناك فوق في السما

وبيختفي ... لو في سحابه مغيمه

وفثانيه يرجع ...

يشهد اوام على حبنا

يفرح اوي وكانه واحد مننا


وساعات كتير تلاقيه وحيد وسط النجوم

واللحظه بتعدي عليه الف يوم

وكانه مجروح زينا ...

مش قلتلك كأنه واحد مننا ؟!


ايوه القمر ...

الي عشان آل نشكره

بعتنا ليه (نيل) افندي يصوره

واما رجع و(داس) عليه ...

قالنا ...

ان الي كان بيحبنا

وكانه واحد مننا ...

مهوش قمر ؟!


امال ايه يا نيل أفندي ؟

لقيته انسان زينا ؟

فيه ملايكه بتطيع اوامر ربنا ؟


طب والدموع

الي بشوفها في عينه لما ...

يكون حزنان اوي...

دي بحر مالح ؟

ولا نيل زي اللي موجود عندنا ؟


طب بلاش الدمعتين ...

وانت ماشي هناك ...

لقيت ورقه وقلم ؟

دفتر وفيه سنين كتيره ...

مليانه بالخوف والألم ؟


طب بلاش سيرة الألم اللي مالي ارضنا ...

قوللي طيب ... لقيت فيه الهنا ؟


طب لقيت صورتي هناك متعلقه ؟

انا وحبيبتي والأمل ؟

انا وحبيبتي والنجوم ؟

انا وحبيبتي والقمر ؟

اكدب عليا ... قلي انك شفتنا

اصلك انت مهما تقولي ...

مش هصدق ... غير انه واحد مننا !


بتقولي لازم اسمعك ؟

هتقوللي مين هوا القمر ؟


بتقول حجر ؟

بتقول تراب ؟

بتقول جبال ؟


بتقول غموض ؟

بتقول سكون ؟

بتقول ظلام ليله طال ؟


هتقوللي ايه ولا ايه ؟

لكني هفضل أسألك ...

ملقيتش صورتي هناك متعلقه ؟

انا وحبيبتي والأمل ؟

انا وحبيبتي والنجوم ؟

انا وحبيبتي والقمر ؟

اكدب عليا ... قلي انك شفتنا

اصلك انت مهما تقولي ...

مش هصدق ... غير انه واحد مننا !


وانت برضو لازم تصدق

اني بشر ...

ومنيش ملاك ومنيش شيطان

وان القمر ...

عمره مكان حتة حجر !


أقول كمان ؟

انا بشر ...

ومنيش ملاك ومنيش شيطان!

والقمر عمره مكان ...

حتة حجر !



تمت
انا مش ملاك
محمد نبيل
15/5/2008

الاثنين، 5 مايو 2008

عيوني الحزينه ... من البوم ليكو 2007



عيوني الحزينه...


حتي الدموع مش راضيه تنزل منها


عيوني الحزينه...


بتخاف تغمض للغربه تجرح رمشها


عيوني الحزينه


هيا العيون اللي زمان كانت بتفرح


عيوني الحزينه


ملقتش وسط الناس أمان مبقتش تسرح


عيوني وعيونك


مشافتش غير الحزن بعد مسبتهم


عيوني فجوفنك


بعد الفراق عيوني فضلو لوحدهم :(


لما بنــــــــــام


عيوني تفضل صاحيه تبكي


وتقول كـــلام


ولنبض قلبي عيوني تشكي


وساعات بتصرخ

لكن نداها ميتسمعش !!!


وساعات بترسم


رسومات حزينه متتفهمش !!!


تسأل سؤال


بس الجواب صعب تلاقيه عند حد


بعد اللؤى


ليه العيون نصيبها بعد !!!

من البوم (ليكو 2007)