الجمعة، 5 سبتمبر 2008

مش مستعد أكون بطل !




مش مستعد
مش ضعف مني
او حتي بعد ...

مش مستعد
صدقوني مش هزار
كلامي جد ...


مش مستعد اكون ورق
مكتوب عليه حيره وقلق
وخوف مخيف
وخوف يخلي كلمتي
تهرب ...
تضيع ...
او تتحرق !

مش مستعد اكون ورق

مش مستعد اكون طريق
فيه ناس بتمشي عالقلوب
وناس بتغرق في الذنوب
وناس تتوه ...
برغم ان حلمهم
واضح اوي وسط الطريق !

مش مستعد اكون طريق

مش مستعد اكون مطر
ينزل ويغرق في التراب
والزرع يتخانق عليه ويا البشر

واسيب مكاني في السحاب
فوق البيوت ...
علشان اموت ...
او حتي علشان اتقتل

وارجع
وارجع بخار ...
واضيع واتوه بين الضباب
وانتحر ... !

مش مستعد اكون مطر

مش مستعد اكون بطل
في روايه اللي كتبها خايف تتقري
او خوفوه ...
او خوفوا اللي قراها
ليمسكوه ...
قاعد بيقرى في قصتي
قصة بطل ...
قصة بطل كتب التاريخ
ومهمهوش
انه يكون حبة كلام
دلوقتي خافوا يكتبوه
او يقروا عنه !

بيخافوا منه ؟
بيخافوا منه ولا عليه ؟
بيخافوا ليه ؟

ومهما كان صعب الجواب
مش مستعد اكون بطل جوا كتاب
عالرف خايفين يفتحوه ...
او يقروا فيه !

صدقوني احسنلي اتقتل
ولا اني يوم اكون بطل ...

مش مستعد اكون بطل !

مش مستعد اني احب
واكتب كلام بين الورق
يفتح طريق للعشق فوق ارضنا
واعشمك ...
ان المطر بكره هينزل عندنا
وتحبي فيا
واحب فيكي
وفي النهايه أكون بطل

لكن بطل ...
مش مستعد يكون بطل !

ليكوريكا
5-9-2008

هناك 26 تعليقًا:

wafaa يقول...

غرق المطر فى التراب بيحيى الزرع , مش لازم الواحد يعيش لنفسه بس
ليه ؟؟ ماتكونش بطل عايش لغيرك ويفتكروك بالخير

ليكوريكا يقول...

wafaa

اولا اهلا بيكي في مدونتي المتواضعه لاول مره واتمني متكونش اخر مره

وبالنسبه لكلامك

فالاختيار هنا بالنسبه للمطر واحد من اتنين

انه فعلا ميكونش اناني وينزل عشان الزرع

وساعتها مصيره هيبقي الموت او القتل او الانتحار

المطر هنا مش زي اي مطر

المطر ظروفه خلته مقداموش غير اختيار من اتنين

ليكون اناني ... لينزل ويموت

وساعتها برضو مش هيقدر يساعد الزرع ، لان في بشر هياخدوا جثته ويحرموا الزرع حتي من انه يفتكره بالخير

ظروفنا ساعات بتخلينا نكون اضعف مننا بكتير ...
ظروفنا كتير بتحرمنا نكون ابطال

كل رمضان وانتي طيبه

تحياتي

ليكوريكا

صوت من مصر يقول...

البطل هو من يحقق حلم الجميع ؟
ومن الاخر بلاش احباط وفكر لبكره هتعمل ايه ؟

ليكوريكا يقول...

معنديش اعتراض علي كلامك يا صوت من مصر

البطل هو من يحقق حلم الجميع :)

وماله :)))

بس انا واحد من الناس مش شايف ان الجميع يستحقوا حتي مساعدتهم لانهم اول من بيتنكر ليك بعد كده

ده وصف البطل وانا مقتنع بيه

بس مش مستعد :)

نورتني ويارب دايما :))

ليكوريكا

صوت من مصر يقول...

بص هقولك ياعمنا انا كنت زيك تمام اتعرفت على شخصت بقوله يا ابويا من كتر ما هو بيفكر ازاى يرفع كفائه المجتمع قالى كلمه قالى فى اوربا وامريكا الى بيعرف معلومه مش بيبخلبيها على حد ؟ هنا لا ليه منغيرش من نفسنا ؟
حاول تتغير هتلاقى ؟

hamsaa يقول...

انا متابعه المدونه بتاعتك من فتره وبيعجبني اوي الحاجات اللي انت بتكتبها بس المره دي حسيت انك محبط اوي بس لو كل واحد قال زيك كدا يبقى قول ع الدنيا السلام بقى وكل واحد يعيش لنفسه وخلاص
القصه اللي قالها النهرده عمرو خالد ليها علاقه بالموضوع دا واسمحلي اني احكيهالك ومعلش لو طولت بس لازم احكيها
هي قصه اصحاب الاخدود وبتحكي عن غلام عنده 15 سنه والقريه اللي كان عايش فيها بيحكمها ملك ظالم وبيقول ع نفسه انه اله والناس كانت بتعبده خوف منه والغلام كان بيتعلم ع ايد ساحر دا طبعا من حاشيه الملك وكان في راهب كان ع الحق وبيعبد ربنا وهو هرب من الملك وعاش في كوخ بعيد عن الناس المهم في الاخر ان الغلام كان بيتعلم ع ايد الساحر والراهب وفي الاخر عرف ان الراهب هو اللي ع حق وامن بربنا
والغلام بدا انه يختلط بالناس ويعمل ع خدمتهم وبعد حاجات كتير حصلت انا بس عايزه اختصرلك ان الملك مسك الغلام وحاول انه يقتله بس في كل مره كان الغلام بيدعي ربنا وكان ربنا بينجيه وبعد دا كله الناس برضوا كانت خايفه من الملك ومامنتش بربنا فالغلام قال للملك ان مش هيقدر يموته الا بامره هو وقاله انه يجمع الناس وانه لما يجي يموته يقول بسم الله رب الغلام وفعلا الملك لما قال كدا قتل الغلام الناس بعد لما مات قالوا امنا برب الغلام
اللي عايزه اقوله في الاخر انك بتقول انه مفيش حد يستاهل انك تعمل حاجه علشانه بس شوف الولد دا عمل ايه برغم ان الناس مامنوش بيه الا انه في الاخر فضل انه يموت لو كان موته دا هيخلي الناس تؤمن بربنا لانه كان عنده رساله وهو كان بيعمل كدا علشان خاطر ربنا حتى لو مفيش حد بيقدر بس هيلاقي الجزاء عند ربنا
ومعلش انا بجد طولت عليك اوي وانا نفسي تعبت من كتر الكتابه بس القصه دي بجد حلوه اوي ولو عايز تسمعها كامله ممكن تنزلها من موقع عمرو خالد

enjy يقول...

اول مرة ادخل على مجرد مشاعر يا اخ ليكو بس واااااااااااضح انها مش الاخيرة ... سلام عشان الحق اقرى باقى البوستات اللى فايتانى

ليكوريكا يقول...

صوت من مصر

سعيد بوجودك لتاني مره في مدونتي المتواضعه

اكيد كلنا محتاجين نتغير

ادعيلي ...

ليكوريكا يقول...

همسه

سعيد جدا جدا جدا

انك خرجتي عن صمتك ومكتفيتيش بالمشاهده زي كل مره

لو كان الاحباط هيخلي الناس يردوا كده ، فكده هتخلوني محبط علي طول

القصه قريتها وعجبتني جدا جدا جدا

جايز اكون اتسرعت وكنت فعلا محبط وانا بكتب الكلام ده

بس اعذروني ...

لان دي مجرد مشاعر

اللي بحس بيه بكتبه هنا ومبفكرش بقي ان كان صح ولا غلط


شكرا ليكي عالرد وعالقصه

وان شاء الله القادم افضل

ليكوريكا

ليكوريكا يقول...

انجي

مجرد مشاعر منور بيكي

يارب القديم والجديد يعجبك

ومستني ردودك دايما

نورتيني مره تانيه

ليكوريكا

شمس النهار يقول...

كلام جميل ومشاعر يجب ان تحترم لكن
يجب اننا مانستسلمش
والبطل هو اللي بيتغلب علي المشاعر السلبيه
والمفروض ان الواحد يعمل الخير وما يستناش الشكر من حد
يعمله لوجه الله
ربنا معاك

عاقلة علي ارض الجنون يقول...

هتصدقني لو قلتلك انك رائع

أول مره آجي هنا لكن بالتأكيد مش الأخيره

حاول تكون بطل علي الأقل عشان يبقي فيه أصحاب رساله يستشهدوا بسبب انهم قروا كتاب عنك ف يوم و لا سمعوا سيرتك ف موال الحكايا

بجد رائع .. لكن حاول تبقي بطل ف يوم من الأيام

علي فكره كمان صورتك الرمزيه رائعه

و مؤلمة بعض الشيء

ياسمين

Blue Nile يقول...

بص لو على الاسلوب رائع جدا وكلام منتقى وجميل
انت عارف رايي في كتاباتك من زمان وبعشقها
لكن الروح اللي بتتكلم بيها انهزامية شوية او فيها استسلام
خليك بطل عشان نفسك عشان تبص في مرايتك تلاقي نفسك بطل

كيارا يقول...

الله الله بجد

مش مستعد اكون طريق

فيه ناس بتمشي علي القلوب

الله عليك بجد

دي اول زياره ومش الاخيره طبعا

Dr.Hammood يقول...

جميل اوي تعبيرك

عجبني الاسلوب كمان نفسه

تحياتي ليك يا شرقاوي


كل سنة وانت طيب


محمد رضا
شخصية عامة

حصل خير يقول...

مش مستعده اكون بطله انا كمان
بجد جميله كالعاده يا نبيل
-----------------------
شفت عملت لك بروباجندا يا عمنا الشاعر
هبه الصادى بتقولى انها شافتك يوم التكييس
اصلها كانت عاوزه تعمل مشروع تبع سايف للشعر
فقلتلها انك بتكتب حلو جدا

ليكوريكا يقول...

شمس النهار

شكرا لوجودك اول مره علي بلوجي المتواضع

(والمفروض ان الواحد يعمل الخير وما يستناش الشكر من حد
يعمله لوجه الله)

عندك حق

شرغني وجودك مره تانيه

واتمني متكونش اخر زياره

ليكوريكا

ليكوريكا يقول...

ياسمين

شكرا لوجودك هنا وفي بلوج احلام مع ايقاف التنفيذ

مش محتاج اقولك قد ايه انا سعيدبكلام

واتمني يدوم التواصل باذن الله

ليكوريكا

ليكوريكا يقول...

بلو نايل

كل سنه وانتي طيبه

بس من كلامك كده هبقي بطل اناني ؟؟؟

بس جميل ان كل الناس عارضت كلامي

في امل :)

ليكوريكا

ليكوريكا يقول...

كيارا

اتمني يكون كده فعلا

مستنييكي

ليكوريكا

ليكوريكا يقول...

دكتور محمد رضا

اكيد يشرفني وجودك هنا

وانت واحد من اهم الشخصيات العامه اللي نورت البلوج

ابقي تعالي تاني

مستنييك :)

ليكوريكا

ليكوريكا يقول...

حصل خير :)))

تصدقي حلو الاسم ده يا حسناء

اهو علي الاقل اشيك من لست (قدري) :))

بصي يا ستي بقي

اولا شوووووكرا جدا عالتصييت ده

وهيا جايه بتكلمني انا استغربت اساسا انها ازاي عرفتني وكمان عرفت اني بكتب شعر وكده

طبعا هيا قالتلي انها زميلتك وانك اللي قلتلها

بس مكلمتنيش في موضوع سايف

وانا كنت يوميها مش في المود خالص ومكنتش طايق نفسي

عموما (حصل خير) ...

ومتنسيش تقولي للناس اني مشاعرجي وبسسسسسسسسسسس

ليكوريكا

كلام على بلاطة يقول...

كل عام وانت بخير

ليكوريكا يقول...

وانت طيب يا كلا علي بلاطه

ابقي تعالي :)

ليكوريكا

EMMY BABY يقول...

انا اول مرة يا ليكوريكا ادخل على مجرد مشاعر بس الحمد لله انى مدخلتش من اول هنا ودخلت من اول مستعد اكون بطل

متخليش قسوة الدنيا علينا تضعفك خليها تمدك بقوة من كتر قسوتها وساعتها هتقدر تكون بطل فى دنيا فقدت معنى كلمة بطل

اروح بقى ارد على مستعد اكون بطل

تحياتى

ايمى

حاتم عرفه يقول...

ليكوريكا..
بجد مدونتك رائعة جدا.. وأحب أبدي لك انبهارى من أول مرة أدخل فيها..
بجد مش مجرد مشاعر.. دى مشاعر تغير حالة.. وتفتح مخ.. وتخلي الواحد يفكر كتير.. وهى دي بطولتك المطلقة اللى محدش هاينسهالك.. لأنك طول مانتا بتفكر فى اللى حواليك وشاغلك.. وهامك انك تغيره..
فاسمحلى
انت بطل غصب عنك..
بيتهيألى همسة ظبطتك فى الرد عليك.. بقصة الغلام.. لأنها أفضل تعليق على قصيدتك فعلا..

شاعر حقيقي ومتميز..

ورمضان كريم يا ابن الزقازيق الجميل..

تحياتي