الخميس، 11 سبتمبر 2008

خلاص خلاص هكون بطل !


كلام كتير
وجعولي راسي يا جدع
والمشكله ...
ان المشاكل كلها
عاوزينني اقعد احلها
واكون بطل !!!
بطل بجد ...
يقول - كلامه يتسمع !

خلاص خلاص
ركز يا شعب ...
ويايا اصلي هنقذك
من اي شيء هينرفزك !

منا بطل ...
ونصبوني فوق الجبل ...
اللي نزل من فوقه صخره
وياريتها صخره صغيره
زي اللي بيها بيتقفل ...
علينا قبر ...
وبنتدفن !

ياريتها صخره صغيره
متدحرجه من فوق جبل
تنزل وتوصل حيّنا
وتقف طابور زينا

واما الآدان في المغربيه
ينادي --- تيجي ...
وتبل ريقها ببق ميه
والميه تطلع صرف صحي
مش معدنيه !

ترفع ايدها تشتكي
للي خلقها مننا
وتقول يارب
اني صايمه ... اني صايمه !

ياريتها صخره صغيره
يبنوها حيطه ...
تداري خوفنا وحزننا
ونستخبي مالبرد فيها
والشمس تدخل عندنا !

ياريتها صخره صغيره
يقدر شبابي يهزها
وصوابعي تقطع جلدها
واشيلها من فوق صدرنا
ويا الهموم اللي ماليه قلبنا
وبصرخه مني تتفزع
ترجع هناك فوق الجبل
منا بطل !!!

ركز يا شعب ...
لتاني مره بحذرك
دنا البطل اللي جاي ينقذك
من الصخور ...
ومن الطابور ...
واي شيء هينرفزك !!!

متدققوش عالكلام اللي بقوله
منا خوفي انكو تفهموا
ولو فهمتوا ... تتكلموا
اصل انتو ايه ؟
حبة بشر ؟؟؟
هههههههههههه
ضحكتو قلبي :)
اصل البشر
في بلاد بعيده مش بلدنا
رخاص اوي زي المطر !!!

تمت
ليكوريكا
11-9-2008
----------------------------------
اللي مش فاهم حاجه يقرا البوست ده
اضغط هنا
بعنوان مش مستعد اكون بطل
ويقرا ردود الناس
ويعيش معانا
واكيد هيفهم !
كل رمضان وانتو بخير
ليكوريكا

هناك 22 تعليقًا:

صوت من مصر يقول...

اخيرا قررت وسمعت كلامى
عموما مبروك على البطوله المطلقه ؟

عايش ولكن يقول...

يمكن تكون بطل
وسط المعارك
تدخل تعارك
ويا البشر من غير سلاح
ايوه القدر خلاك مباح
احنا فى خطر وانته البطل

تبقى بطل دايما مبددع
على فين ما نروح دايما تشجع
مهو مهما روحت ومهما جيت
اخرك تقول الكلمتين ويلا نخلع
ولا اقولك طب يلا ولع

مصر يا سيادنا بقت ملكيه خاصه
لا تقول بطل ولا حتى مين يبص بصه
مهى ارضنا وصحيح بلدنا كلنا
لكن دكر قول انا هنا واوصل للمنصه

مش لست أدرى , عاوزه اسم تانى يقول...

كل كلامك مؤثر بس اول مره يبكينى
بجد اخر جمله محزنه اوى
الناس فى بلدنا رخاص زى المطر
تفتكر هنفضل رخاص كتير؟؟؟؟

قلب ينبض لله يقول...

أهم حاجة تكون بطل لأقتناعك بذاتك وبقدراتك مش علشان الناس عاوزة منك كدا

كلامك مؤثر جداا
وأنت صحيح بتسخر من الوضع ولكن بتسخر بحزن وألم
بصراحة عندك حق ماهو اللي بيحصل دا لايسر عدو ولا حبيب
ربنا يصبر أهالي الدويقة

غير معرف يقول...

بص
دخلت المدونة بجد بمحض صدفة غريبة

بس كلامك حلو اوى وعاجبنى جدا

ويا سيدى وتتعب نفسك ليه

ماياما ابطال حاولوا غيرك عمله ايه ؟
يعنى الحاضر واللى فات اللى جاى هيطلع احسن منه ليه
وفى ايه ؟
ما البطل جوا الورق
والورق ويا القلم
ويا الكتاب اللى اتقرى
على مكتبة
تحت صخرة اندفن
ومقدرش عليه مليون بطل

حط همك ويا همى
ويا هموم تانية بتزيد تملى
وتعالى ننفخ فيهم
بنار جوانا
يمكن بيهم نقدر نصنح احنا بطل

بطل من هم
سلاحه غم
وشجاعته وهم
تصلح بيهم المسألة
وتحل بيهم معضلة
سابها الزمن فوق جدارنا معلقة

فوق يا بطل
ليه تكون بطل
فى زمن فيه البطل
جوا الورق
اللى اتحرق
فى المكتبة

واللى بيتحرق
فى اعصاب شبابنا المتلفة

انسى بقى
وخلاص مافيش اى بطل
ما يقدر عليها غير ربنا
بشعب تانى يفهم صحيح معنى البطل

سلام يا بطل

آية

EMMY BABY يقول...

معرفش والله يا ليكوريكا بجد كلامك يبكى

الوضع فعلا بقى مثير للسخرية مثير للشفقة والالم

هنقول ايه زى مانت قلت ارواحنا رخيصة اوى فى بلدنا

بس زى ماقلتلك احنا بايدينا نكون ابطال فى دنيا فقدت معنى البطولة

عموما مش لازم تبقى بطل علشان انت مطلوب منك كدة


خليك بطل علشان انت مقتنع بكدة

تحياتى

ايمى

Blue Nile يقول...

الحمدلله يا بطل
عجبتني جدا رغم الحزن اللي فيها
ياريتها صخره صغيره
متدحرجه من فوق جبل
تنزل وتوصل حيّنا
وتقف طابور زينا


اصل البشر
في بلاد بعيده مش بلدنا
رخاص اوي زي المطر !!!

عجبني اوي المقطعين دول

عارف يا محمد اسلوبك قريب من احمد فؤاد نجم
اسلوب ساخر حزين

كيارا يقول...

اصل البشر
في بلاد بعيده مش بلدنا
رخاص اوي زي المطر !!!


بجد مقطع صعب اوووووووووووووووووووووووووي اوي

ANGHAM ALLAM يقول...

هي ليه الحقيقة دايما تزعل
يـــــــا نـــــــاس؟؟!!

دكتور بهــدوء يقول...

رمضان كريم

تفتكر ممكن يكون واحد بطل
يكفي
ولا لازم الكل يكون بطل
تحياتي لابداعك

بنت الماضي يقول...

نبيل
مش قلتلك عجبتني
ومش هكتب فصحى عشان ما تتخنقش مني
مع انها حلوة
خليك بطل
بس يارب...تكون بطل في نظر نفسك انت الاول
والاهم :)

شمس النهار يقول...

ايوه كده خليك ايجابي
مين عارف يمكن في عتمة الليل
يطلع واحد مش محبط قوي
ويخلص اللي احنا قيه ده
عموما كلامك لطيف ومحبب الي القلب

شمس النهار يقول...

نسيت انت ليه ماجاوبتش علي الفزوره اللي عندي في المدونه

كلام وخلاص يقول...

انت دلوقتى عملت زى جحا وابنه والحمار لما كان يركب ابنه الناس تقول على الولد مش مؤدب ولما يركب هو تقول عليه ماعندهوش رحمة ولما ركبوا سواء ماعندهمش رفق بالحيوان وفى الاخر شالوا الحمار والناس برضه اتكلموا وقالوا مجانين
انا عن نفسى مع القصيدة الاولى مش مستعد اكون البطل
(تفضيل الواقعية الكاملة على الاستسلام للشعارات المجردة، و الاعتراف بأن قدرة المرء منا على أن يحدث بعمله المنفرد تغييرا مهما في النظام السائد قدرة محدودة جدا، وأنه قد تكون من الحماقة أن يضحي المرء بنفسه، أو بمصالح شخصية مهمة له أو لأسرته، في سبيل التمسك بمبدأ عام لا توجد أمامه فرصة جدية للتحقق في المدى المنظور.) جلال امين ماذا علمتنى الحياة

enjy يقول...

ايوة كدة يا راجل خفت تغير كلامك بجد و تطلع بطل ......... مش قصدى اى حاجة غير انى شايفة نفسى كويس فى الكلام دة سلام

enjy يقول...

انا نسيت اقول لك انى قريت جوا منك جوا منى............بس مش هعلق

smska يقول...

مفيش فايده !!:)
كل سنة وانت طيب يا دكتووووور
ورمضان كريم ..:))

بنت مصريه يقول...

ليكوريكا
فيه فطار للمدونين ف ساقيه الصاوى يوم الجمعه 26 وهيحضره خالد الصاوى كلنا رايحيين نتمنى نشوفك هناك
لوعايز تعرف التفاصيل زور مدونه عليا حلييم
http://aliahlim.blogspot.com/

Sometimes يقول...

اصل البشر
في بلاد بعيده مش بلدنا
رخاص اوي زي المطر !!!
-------------------

انا معاك الناس بقت رخاص فعلا
بس المطر مش رخيص
ده حياة


بس جميلة يا ليكو
حلوة بجد

wafaa يقول...

وعجبى

كل سنة وانت طيب

غير معرف يقول...

المشكله ان كل كلمه انت بتكتبها بتبقى صح ميه فى الميه ونفسى مره اقولك انت كداب البلد دى مش كده لكن للأسف انت مش كداب

الواحد نفسه يغير البلد فى كل حاجه
ليه الشباب يسبوها ويسافروا بره ليه مستوى التعليم بره احسن من هنا
ليه كل حاجه بره بقت احسن ليه البلد دى متكنش احسن بلد

بغض النظر عن الكلام الى انا قلته
كلامك جميل جداااا

مروة

soul_of_darkness يقول...

كلمات رائعه جدا
والمعنى وصل واتفهم

<<<
ركز يا شعب ...
لتاني مره بحذرك
دنا البطل اللي جاي ينقذك
من الصخور ...
ومن الطابور ...
واي شيء هينرفزك !!!

متدققوش عالكلام اللي بقوله
منا خوفي انكو تفهموا
ولو فهمتوا ... تتكلموا
اصل انتو ايه ؟
حبة بشر ؟؟؟
هههههههههههه
ضحكتو قلبي :)
اصل البشر
في بلاد بعيده مش بلدنا
رخاص اوي زي المطر !!!
<<<

بس البطل ده لو موجود هايقدر يهز الصخره , ولا الصخره هاترد عليه وتقوله

بقى انت بقى اللى عاملى فيها عم البطل

طيب تعالى وورينى ازاى هنا تغسل حلل

هانعلمك ازاى نقطع جلدك انت يابطل

وماتصرخش ولا تستغيث ده حقنا واحنا جوه المعتقل