السبت، 28 يونيو 2008

التوبه مش للميتين !


محتار انا ...
حاسس كأني مش انا
ولا حتي همّا زي همّا


حتي السطور ...
اللي الكلام غرقان تملي فبحرها
شايفها ليه وكأنها ...
ترعه فبلدنا
والناس عليها ... عاملين هالُمّا

والحروف واقفين طابور
مستنيين ...
مستنيين الكلمه تيجي
ومش بتيجي !
اصل الكلام واقف في زورنا
مستني يمكن ييجي دورنا
ويسمحولنا ...
نقول وننطق ...
بالحاجات والمحتاجات
جايز نقول حاجه مهمه !

عارفين انا لو كنت حرف هعمل ايه ؟
كنت اتكتبت ...
كنت اتكبت ولو لوحدي
فصفحه فاضيه ...
مفيهاش كلام يقلب دماغي
وكفايه اني ...
اتقري
واتنطق
ويصرخوني
ويهمسوني
ويخافو مني ... فيمسحوني !

لكن انا ...
خلاص بقيت
صوره وصوت

ومهما حاولوا يمسحوني
ويقتلوني ... فوق الورق
مش هموووت !


عارفين انا لو كنت حرف هعمل ايه ؟
كنت اتكتبت ولو لوحدي
فصفحه فاضيه ...
مفيهاش كلام يقلب دماغي
ولا صوره خايفه تترسم
ولا سطر خايف مالقلم ...
ليدوس عليه ...
وهعمل ايه ...

اصلي اتخنقت من السكات
ومن الحروف ومن البشر
ومن الحاجات ...
اللي ياما حلمنا بيها
وعشنا فيها
ومن كلامنا عالقدر

هوا القدر ...
هوا اللي خلى البشر
واقفين طابور زي الحروف
جواها خوف ...
مستنيين الكلمه تيجي
ومش بتيجي ؟

ولا القدر ...
هوا اللي خلانا صور
عالرمل خايفه تترسم
مع انها كانت زمان
بتبتسم ...
برغم موال الألم
اللي زمان كان برضو فينا
وكان ملينا ...

ولا القدر ...
هوا الي خلانا سطور
زي القبور
تفتح تملي قلبها
للميتين ...
والمقتولين ...
والمخروصين ...

والناس تجيبنا
علشان تسيبنا
وسط القبور
فوق السطور
اللي مفيش فيها كلام
وفي سلام !

بس سلام للميتين
والمقتولين ...
والمخروصين ...
وللحروف اللي كانوا واقفين طابور
وللصور وللسطور
وان كان سلامنا في القبور
خلوه يغووور
خلوه يغووور !

او حتي خلوه يتدفن
وسط التراب وسط العفن
ودموعنا تُبقاله الكفن
وصراخنا يبقاله ذنوب
ولو نتوب ...
التوبه مش للميتين
المقتولين ...
المخروصين ...

التوبه دايما للحروف
المكتوبين ...
المرسومين ...
المنطوقين ...
المصروخين ...

التوبه مش للميتين !

تمت
ليكوريكا

--------------------------------

شوف بوست
ليكوريكا في قاهرة المعز
علي بلوج
(احلام مع ايقاف التنفيذ)
exclusive :)
http://lekorika.blogspot.com/

هناك 30 تعليقًا:

احلام اليقظة يقول...

رااااائع
فعلا التوبة مش للميتين
اعتقد ان دى حكمة النهاردة
ولا القدر ...
هوا الي خلانا سطور
زي القبور
تفتح تملي قلبها
للميتين ...
والمقتولين ...
والمخروصين ...

والناس تجيبنا
علشان تسيبنا
وسط القبور
فوق السطور
اللي مفيش فيها كلام
وفي سلام !

بس سلام للميتين
والمقتولين ...
والمخروصين ...
وللحروف اللي كانوا واقفين طابور
وللصور وللسطور
وان كان سلامنا في القبور
خلوه يغووور
خلوه يغووور !
كلمات جميلة وصور ممتعة وحالة عالية جدا
بجد انا مبسوطة بالبوست دة
دومت بخير

smska يقول...

اممممممممممممم
انت اللي جنيت على نفسك يا جدو !!
بس اما اشوفك ..:D

just smile يقول...

لم تترك لي ما أنثره
فقد ضاااعت احرفي في تلك الحقائق
أفكااااارك قمه في الروعه
مع قدرتك على نثرها
حقا تقبل مروري بكل ود

قلب ينبض لله يقول...

بصراحه

شعرك جميل اوي وبيناقش مواضيع بتمسنا

وفعلا صدقت جدا لما قولت ان التوبه مش للميتين

مبدع بجد

انا مش سلبى يقول...

التوبة مش للميتين

تسلم دماغك

ذربونة هانم يقول...

بجد تحفة اوى اوى
الصور فيها مش طبيعيه
بجد جميله و معبرة

Blue Nile يقول...

جميل اوي
بجد انت مبدع في العامية
وافكارك مختلفة
تحياتي

دواير يقول...

والحروف واقفين طابور
مستنيين ...
مستنيين الكلمه تيجي
ومش بتيجي !
اصل الكلام واقف في زورنا
مستني يمكن ييجي دورنا
ويسمحولنا ...
نقول وننطق ...
بالحاجات والمحتاجات
جايز نقول حاجه مهمه !
ــــــــــــــــــــــ
دورنا جالنا من زمان وساعتها فضل الكلام في زورنا وخاف يتنطق ولا يمكن احنا خوفنا من اللي جاي بعد الكلام... ومش عارفة دورنا هيجيلنا تاني ولا هية مرة في العمر وخلاص القطر فاتنا..
ـــــــــــــــــــــــــ
هبطل أقول كلمة رائعة..عشان كده شكلي هكررها كتير أوي.تحياتي

Eman يقول...

لكن انا ...
خلاص بقيت
صوره وصوت

ومهما حاولوا يمسحوني
ويقتلوني ... فوق الورق
مش هموووت !

........................
الفقرة دي عجباني مووووت
أحساسك عالي أوي في كتابتك

دمت مبدعا

لست أدرى يقول...

مش هقول انها جميله جدا لانها هى فعلا كده مش محتاجه كلام

فيها كل حاااااااااااااجه
فعلا يمكن يكون القدر خلانا زى الحروف اللى واقفه فى الطابور
وفعلا الحروف خايفه من القلم
واحنا نفسنا نكون حرف بس فى صفحه فاضيه

ايه التشبيهات دى بس؟؟
معبره جداااااااا ومنطقيه فى نفس الوقت
واحسن حاجه انى اول مره اسمعها كالعاده

انت ليه مش بتعمل ديوان ولا حاجه زى كده علشان تضم فيها شعرك ده

بجد خساره حد بيكتب كده يبقى كده
ربنا يوفقك ان شاء الله

بنت مصريه يقول...

الله يا ريكو جميل قوى الشعر ده
اتمنى تنورنى

ادم المصرى يقول...

بوست اكثر من رائع اهنيك عليه بجد حقائق عشانا وياها ولم ندرى لها بال بجد بوست رائع اخى

!!! عارفة ... مش عارف ليه يقول...

اصل الكلام واقف في زورنا
مستني يمكن يجي دورنا

عاليه اووووي يا ليكو


دومت دوماً مبدعاً

ليكوريكا يقول...

احلام اليقظة يقول...
رااااائع
فعلا التوبة مش للميتين
اعتقد ان دى حكمة النهاردة

----------------------------

شكرا لردك وزيارتك

اتمني يكون الكلام فعلا عجبك

ومبروك عليكي التعليق الاول

في المقصوره الليكوريكيه :)

ليكوريكا يقول...

smska يقول...
اممممممممممممم
انت اللي جنيت على نفسك يا جدو !!
بس اما اشوفك ..:D

----------------------------

شكرا ليكي يا ساره

بس هتشوفيني فين بس

جدو ليكو مات من زمان :((

ليكوريكا يقول...

just smile يقول...
لم تترك لي ما أنثره
فقد ضاااعت احرفي في تلك الحقائق
أفكااااارك قمه في الروعه
مع قدرتك على نثرها
حقا تقبل مروري بكل ود


------------------------------

بجد سعييييد جدا بردك ده

واتمني يكون فعلا الكلام عجبك

ودايما تمر من وقت للتاني علي بلوجنا المتواضع

شكرا ليكي مره تانيه

ليكوريكا

ليكوريكا يقول...

قلب ينبض لله يقول...
بصراحه

شعرك جميل اوي وبيناقش مواضيع بتمسنا

وفعلا صدقت جدا لما قولت ان التوبه مش للميتين

مبدع بجد


--------------------------------

قلب ينبض بالله

منوره البلوج بجد

وسعيد ان الكلام بيعجبك

لان دي مجرد مشاعر

وانتو بس اللي تقدروا تحكموا عليها وعلي صدقها

اتمني دايما اكون عند حسن ظنكم

واتمني دايما يدوم التواصل

ليكوريكا

ليكوريكا يقول...

انا مش سلبى يقول...
التوبة مش للميتين

تسلم دماغك


------------------------

منورني لاول مره

اتمني يكون الكلام عجبك

ومتكونش اخر زياره باذن الله :)

ليكوريكا

ليكوريكا يقول...

ذربونة هانم يقول...
بجد تحفة اوى اوى
الصور فيها مش طبيعيه
بجد جميله و معبرة


------------------------

ذربونه هانم

منوره بلوج مجرد مشاعر

ابقي تعالي كل شويه :)

ليكوريكا يقول...

Blue Nile يقول...
جميل اوي
بجد انت مبدع في العامية
وافكارك مختلفة
تحياتي


------------------------

تحياتي ليكي

واشكرك علي مرورك وردك

وباذن الله يدوم التواصل

ليكوريكا

ليكوريكا يقول...

دواير يقول...
والحروف واقفين طابور
مستنيين ...
مستنيين الكلمه تيجي
ومش بتيجي !
اصل الكلام واقف في زورنا
مستني يمكن ييجي دورنا
ويسمحولنا ...
نقول وننطق ...
بالحاجات والمحتاجات
جايز نقول حاجه مهمه !
ــــــــــــــــــــــ
دورنا جالنا من زمان وساعتها فضل الكلام في زورنا وخاف يتنطق ولا يمكن احنا خوفنا من اللي جاي بعد الكلام... ومش عارفة دورنا هيجيلنا تاني ولا هية مرة في العمر وخلاص القطر فاتنا..
ـــــــــــــــــــــــــ
هبطل أقول كلمة رائعة..عشان كده شكلي هكررها كتير أوي.تحياتي

29 يونيو, 2008 10:47 م

------------------------------

الدور بييجي مره واتنين وتلاته

والطابور بيخلص وبنقف في اللي بعده

بس زي منتي قولتي المشكله في الكلام اللي واقف في زورنا وحالف ميتنطقس

سعيد بجد ان الكلام عجبك

واتمني دايما تنوري بلوجنا المتواضع

ليكوريكا

ليكوريكا يقول...

Eman يقول...
لكن انا ...
خلاص بقيت
صوره وصوت

ومهما حاولوا يمسحوني
ويقتلوني ... فوق الورق
مش هموووت !

........................
الفقرة دي عجباني مووووت
أحساسك عالي أوي في كتابتك

دمت مبدعا


-----------------------------

شكرا ليكي يا ايمان
والفقره دي برضو من الفقرات القريبه ليا اوي

يعيد بردك ومرورك

يارب متبقاش اخر مره :)

ليكوريكا

ليكوريكا يقول...

لست أدرى يقول...
مش هقول انها جميله جدا لانها هى فعلا كده مش محتاجه كلام

فيها كل حاااااااااااااجه
فعلا يمكن يكون القدر خلانا زى الحروف اللى واقفه فى الطابور
وفعلا الحروف خايفه من القلم
واحنا نفسنا نكون حرف بس فى صفحه فاضيه

ايه التشبيهات دى بس؟؟
معبره جداااااااا ومنطقيه فى نفس الوقت
واحسن حاجه انى اول مره اسمعها كالعاده

انت ليه مش بتعمل ديوان ولا حاجه زى كده علشان تضم فيها شعرك ده

بجد خساره حد بيكتب كده يبقى كده
ربنا يوفقك ان شاء الله


----------------------------

بجد خشاره حد بيكتب كده يبقي كده

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

للدرجادي حالي صعبان عليكي يا حسناء :)))

وااااااااااااااااااااااء

بس يا حسناء زي منا كاتب في هيدر البلوج

دي مجرد مشاعر

بكتب عشان الكلام ميفضل فزووري واتخنق واموووت

ومش فارق بقي ديوان او غيره

سيبي الحاجات دي لوقتها

ومنوره البلوج كالعاده ... بس المرادي مش في المقصوووره بتاعة التعليقات :)

ليكوريكا

ليكوريكا يقول...

بنت مصريه يقول...
الله يا ريكو جميل قوى الشعر ده
اتمنى تنورنى


---------------------------

ليكو يا بنت مصريه

ايه (ريكو) دي :)))

يارب ترجعي من اسكندريه وتجيبيلنا هديه معاكي :)

ليكوريكا يقول...

ادم المصرى يقول...
بوست اكثر من رائع اهنيك عليه بجد حقائق عشانا وياها ولم ندرى لها بال بجد بوست رائع اخى

----------------------------

ادم المصري

اسعدني تشريفك وردك

واتمني متكونش اخر زياره

ليكوريكا

ليكوريكا يقول...

!!! عارفة ... مش عارف ليه يقول...
اصل الكلام واقف في زورنا
مستني يمكن يجي دورنا

عاليه اووووي يا ليكو


دومت دوماً مبدعاً


---------------------------

سعيييد ان الكلام عجبك

واتمني متكونش مجامله :)

اتمني تنوريني دايما

وباذن الله يدوم التواصل

ليكوريكا

دكتور بهــدوء يقول...

بجد نووو كوممنت
ما اروعك حين تبدع بالعاميه
جو اون
هايل بجد

Sometimes يقول...

فعلا التوبة مش للميتين

تحفه بجد

ليكوريكا يقول...

دكترو بهدوء

بجد منور ويارب تكون عملت كويس في الامتحانات

اتمني يكون فعلا الكلام عجبك :)

ليكوريكا يقول...

Sometimes يقول...

فعلا التوبة مش للميتين

تحفه بجد

------------------------------

شكرا ليكي ولردك

اتمني يكون المعني وصل فعلا

بتسعدني ردودكم وتشجيعكم

نورتيني مره تانيه