الجمعة، 23 مايو 2008

واحد وعشرين سنه ... عمري أنا !




واحد وعشرين سنه ؟
حاسبينها صح ؟
متأكدين ...
اني انا ...
عمري انا ...
واحد وعشرين سنه ؟

بتقولوا أه متأكدين
ماسكين قلم ...
قاعدين تعدوا في السنين ؟
جايبين سجل ...
مواليد كتيره ...
ارقام كتيره ...
اسماء كتيره ...
كان اسمي بينهم ؟

قالولي اه متأكدين ...
مش انت سين ابن سين ؟
اللي اتولدت في شهر يونيه
يوم سته / سته ؟
ومكان ميلادك اي حته ؟

ايوه انا ...
طيب مدام متأكدين ...
يبقي الغلط راكب جنابي
مع اني عارف اني انا
عمري انا ...
عمره مكان ...
واحد وعشرين سنه !

خلوني اعد ...
وعدوا بعدي
واوعاكوا لحظه تسرحوا
لو لقيتوا عمري قرن ...
واوعاكوا تجروا وتفرحوا
لو لقيتوا عمري يومين !


ياااااه
قد ايه لسه فاكر ...
ايوه فاكر من سنين

لما كنت لسه عيل ...
أيوه عيل ...
انتو ليه مستغربين ؟!

كنت بصرخ ... رجعوني
بس مين يسمع صراخ ...
طفل كان لسه نونو
يعني عنده يوم يومين ؟!

شربوني واكلوني
علموني وفهموني
حطو رجلي عالطريق ...
قالوا امشي ... قمت ماشي
قالوا اجري ... جريت أوام
علموني أقول كلام
علموني أكتب حروف
علموني أحب بلدي ...
مهما اسمع أو أشوف !

بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي
وابقي قادر ...
اني أكابر ...
مهما اكون ... تعبان حزين !

ايوه فاكر
لسه فاكر من سنين ...

لما كان عالضهر شنطه
وفي الايدين زمزميه
كان فيها ميّه ...
كنت بشرب منها لمّا اعطش شويه ...
واما تخلص ...
كنت برضو املاها ميّه

واما كان عليا واجب
وفي الكتاب خدت نجمه
واما كان ليا صاحب
وكنت اقوله كل كلمه

واما كان نفسي أكبر
ايوه كان الحلم وردي
كنت فاكر اني هقدر
مهما كان الصعب ... اعدي !

كنت بحلم ...
كنت برسم ...
كنت بكتب شعر برضو ...
بس عمره مكان حزين :(

ايوه فاكر ...
لسه فاكر من سنين

لما عدى العمر بيا
وسابني صاحبي
كان ساعتها مفيش معايا زمزميه
وفيوميها ...
بكيت عليا مش عليه ...

وكرهت فيه كل الصحاب
حتي الكتاب ...
اللي خدت فوسطه نجمه
كرهته برضو ...
اصله كان اسمه عليه
انه صاحبي
وكان بقولوا كل كلمه !

وفيومها برضو
لقيتني وسط الكون وحيد
بمد ايدي
بس كل الناس بعيد
شايفنني يمكن ؟!
عارفني جايز ؟!
بس الاكيد ...
ان محدش حس بيا
ولا حتى مد نص ايد !

واليوم ده بس
ابقوا احسبوه ... عشر سنين !

ايوه فاكر ...
لسه فاكر من سنين

لما دق القلب دقه
قمت افتح
قلت مين ؟
انتي كلمه عالسطور؟
انتي عالم كله نور ؟

طب اقولك انتي مين ؟

بس لازم توعديني متضحكيش ؟
ومهما كان وصفي (بلدي) ...
اغفريلي
اصلي انا بعدك اكيد مش هعيش ...

انتي ميّه ...
ايوه ميّه ...
بس مش في الزمزميه
اللي كنت زمان بشيلها من سنين

انتى ميّه
وقلبي ارضك
ايوه فيكي اكيد بدوب
كل مشرب بُق منك
تتغفر كل الذنوب !

وابتسامتك السماد
والملاوعه والعناد
هما روحك ...

اما طيبة قلبك ...
تبقي البذور !
انتي ميّه ...
والغيره فيها تخليها تفور !

انتو لسه معايا ولا نمتوا مني ...
اعذروني ...
الكلام ده كله اصله غصب عني
اصل انا حلفت احسب وبضمير
عمري كام من السنين ؟!

احسبو اليوم ده وحده
مليون سنه
بس عدوا عليا يمكن لحظتين !

اصلي فاكر
ايوه فاكر من سنين ...

لما شفت الحلم عاجز
والحب تاه بين الحواجز
والميه خلصت ...
بس فاضل نقطتين !

نقطه مره
زي طعم كل حاجه فارضنا
زي خوفنا لو يضيع يوم حلمنا
زي طفل بريء لقيته بيتقتل
وقالوا ان اللي قتل النخوه فينا
وداس علينا
ده صديق صدوق و مش عدونا !

ونقطه تانيه...
فيها سم
فيها هم
فيها دم

بيها مات الحب
بس سابلي جواب طويل
زي طول قصيدتي ديه

قاللي عيش اليوم بيومه
واوعى تحسب مره عمرك

واوعى تزعل ان قدرك
ان كل يوم يعدي ...
يبقي احلى ماللي بعده

وان اللي وياك النهارده
بكره جايز ينسى وعده !

قاللي سيب همك لربك
هوا عالم بالعباد
زي مالحزن فقلبك
فرحتك ليها معاد !

وفنهاية جوابه ...
ساب ليا وصيه
قاللي شيل زمزميه ...
بس مش تملاها ميه
املاها صبر... ولو شويه !

حسبتوا عمري ؟
عديتوا كام مليون سنه ؟
حسبتوا عمري ؟
ولا هوا يدوب يومين ؟!

واحد وعشرين سنه ...
عدوا كده من غير محس !
واحد وعشرين سنه ...
مستحيل ...
يبقوا كل عمري بس !

تمت / محمد نبيل

6/6/2008
عيد ميلادي الواحد والعشرين !

هناك 47 تعليقًا:

just me يقول...

علموني أقول كلام
علموني أكتب حروف
علموني أحب بلدي ...
مهما اسمع أو أشوف !

بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي

----------------------

بصراحه مش عارفه اتكلم
بجد يانبيل بكلامك ده بتوصل للى جوه ناس كتيييييييير اوى
يمكن تكون بتتكلم عن نفسك
بس فى الواقع انت بتتكلم عن كل الناس اللى عدى بيهم كل العمر ده

بالرغم من انك اتكلمت عن حاجات حلوه فى حياتك اللى فاتت
الا انك بعد كده شوهتها بحزنك
خليتها حزينه زيك
زى الكشكول اللى فيه نجمه
خليته حزين
وحاجات كتيييييييره


احنا ليه كده؟؟؟؟
ليه كل شىء جميل بنقتل فيه جماله؟
تفتكر كره مننا ليه؟
ولا حب ليه لدرجه اننا مش عاوزين نسيبه فبناخده معانا فى حزننا؟؟؟


نسيت اقولك
البقاء لله يا نبيل
لااااا قصدى
كل سنه وانت طيب
والى الله اقرب

قلب ينبض لله يقول...

كل سنه وانت طيب ويارب تكون كل أيامك خير وسعادة

الكلام اللي انت كتبته بيوصل للقلب بسرعه وكأنك فعلا بتتكلم عننا مش عنك


كنت بحلم ...
كنت برسم ...
كنت بكتب شعر برضو ...
بس عمره مكان حزين :(


لما الشعر الحزين بالجمال دا
امال الشعر اللي مش حزين عامل ازاي

بجد كلمات بتمس القلب

ليكوريكا يقول...

احنا ليه كده؟؟؟؟
ليه كل شىء جميل بنقتل فيه جماله؟
تفتكر كره مننا ليه؟
ولا حب ليه لدرجه اننا مش عاوزين نسيبه فبناخده معانا فى حزننا؟؟؟

----------------------

مستحيل يبقي كره يا ايوان
اكيد حب ملهوش حدود
وامل ان مجرد اننا بنفتكره نقدر نسند عليه ونتدارى فيه
جايز واحنا بنفتكر نفرح لمجرد اننا افتكرناه

صدقيني
كلنا محتاجين نقعد مع نفسنا ونحسب عمرنا

البقاء لله يا ايوان
كلنا لها :)

ليكوريكا يقول...

كل سنه وانت طيب ويارب تكون كل أيامك خير وسعادة

الكلام اللي انت كتبته بيوصل للقلب بسرعه وكأنك فعلا بتتكلم عننا مش عنك


كنت بحلم ...
كنت برسم ...
كنت بكتب شعر برضو ...
بس عمره مكان حزين :(


لما الشعر الحزين بالجمال دا
امال الشعر اللي مش حزين عامل ازاي

بجد كلمات بتمس القلب

----------------------------

اكيد سعيد بردك الجميل ده
بس صدقيني طعم الفرحه حلوه
وخصوصا بعد مبنعرف قد ايه الحزن مر

ربنا يجعل ايامنا كلها فرحه
ودايما قلوبنا تنبض لله :)

تحياتي ليكي

ليكوريكا

رئـــــيسـة حزب الأحلام يقول...

كل سنه وانت طيب
وعقبال مائه عام
والتورتة حلوة اوى بس كلماتك احلى
ربنا يسعدك على فكرة انا عيد ميلادى فى نفس الشهر ابقى استناة
تحياتى

FaceMoon يقول...

كل سنة وانت طيييييييييب وعقبال مليون سنة كلامك دايما بيعجبنى حلو كدة وبسيط وبالرغم من بساطته مافيش حد يقدر يكتبة غيرك جميل اوى
يارب السنة دى تحقق كل احلامك وتبقى سنة سعيدة
ومتنساش التورتة والحاجة الساقعة
تحياتى

بنت مصريه يقول...

خلاص يا عم عندك 570 سنه مبسووط
ههههههههههههههههههههه
محمد انت هايل يا محمد
احييك يابنى

محاولة لكسر الصمت يقول...

أولا كل سنة وانت طيب وعقبال ميت سنة...
ثانيا وللأمانة حاولت اختار حاجة عجبتني ما عرفتش..
لأن بصراحة كل المكتوب عجبني...
بجد القصيدة من أول كلمة لآخر كلمة رااااااااااااااااااائعة...
..لا دي رائعة قليلة عليها جدا...
....صحيح انت كاتب حقوق النشر محفوظة...بس معلش أنا نسختها عشان اوريها لناس بتحب الشعر جدا....مع العلم ان اسمك هيفضل مكتوب من تحت....
معلش على التطفل....بس بجد انا ما كانش ممكن ألاقي قصيدة حلوة بالشكل ده ومات انسخهاش...

غير معرف يقول...

ياااه يا نبيل
ليه بس كده؟
دول لسه 21
امال لما تبقى زي حلاتي22 هتعمل ايه :)
حلوة القصيده اوي بجد عجبني فيها مقاطع كتير


بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي



حلو دا اوي


اما عن المحتوى
فصدقني...
ماتحسبهاش
محدش بيعيش زياده ولا بيعيش اقل
وكلو بيعدي
الحزن والهم والزعل والضيق والخوف والقلق
حتى الفرحه والحب والامل والحلم والسعاده


كل سنه وانت زي ما انت يانبيل
باخلاقك وقلبك وتيشرتك الاحمر ههههههه


ايمان موافي

just smile يقول...

تعرف محتاره اققول ايه
يعني بجد حاولت اختار جزء أثر فيه لقتني هختار كل الكلام

عموما اتمنى تقتل ليكو الحزين بايديك وبلاش تستنى حد يقتله لانه هيكون ضاع كتير من بقيت عمرك وبدل ما هتسأل انا عمري كام
هتقول هو ايه عمري هو فين ولامين
بجد مبدع

غير معرف يقول...

كلماتي تعجز عن التعبير .. بجد اكثر من رائع



زهراء

غير معرف يقول...

كلماتي تعجز عن التعبير .. بجد اكثر من رائع



زهراء

Yossry يقول...

مع ان تعليقي يحمل رقم 13

ومع ان انت اللي قولتلي اني ارد دلوقتي

بس بجد انا قولتلك رأيي الشامل الكامل فيها في المحادثة السابقة

وانت تقبلته بصدر رحب
ولك جزيل الشكر والتقدير والاحترام

:)

بس ابقي قولنا انت كنت جايب الزمزمية دي منين

(اي خدمة يا عم:))
انت تأمرني وانا اردلك في اي وقت يا ليكو باشا

وكل عام وانت بخير
انما صحيح اية اخبار التيشرت الاحمر؟؟

غير معرف يقول...

السلام عليكم

عمرنا مش بالورقة والقلم
عمرنا مش بالسنة والثانية
عمرنا بفرحنا ودقايق حزننا
اكيد الحزن اكتر والهم اكتر
لكن دقيقة الفرح ف الدنيا بسنة

كل يوم بنشوف وبنروح ونيجى
جوانا امل مدفون بخوف وهموم

لكن ايمانا بان عمرنا بادينا
وحياتنا راح نرسمها بريشة وقلم
وبالتعب والعمل وبسمة تفاؤل
وطريق طويل ناويين نجرى فية
ونحقق بسمة على وجهنا
ونرسم ضحكةعلى عيونا

وكلة بايدينا


وكل سنة وانت طيب وبالصحة والسلامة ولعلمك سن 21 دة حلو اوى تعرف اول لما تميتهم فى مارس اخت علقة تمام اصلى قلتهم انا كدة من حقى اتجوز عرفى لقيت البيت كلة جرى ورايا بس الحمد لله الجرى نفعنى اصل الجرى فى الحالات دى نصف الجدعة ومن رايى هو الجدعنة بعينها


معلش طولت عليك

ياسر سليم يقول...

سلام عليكم

ايه يا عم محمد

الأول كل سنة وانت طيب

ثانياً .. كويس جداً انك تسيب كلام تكتبة فى كل عيد ميلاد

وبعد كده هتراجع وتقول انا كتبت كذا فى عيدى الكذا

بس كل ده عشان واحد وعشرين سنة
امال لما تبقى ادى وتوصل لل 24 هتعمل ايه ؟

اكيد هتكتب عيد ام ميتم !

تحيات كبيرات

كاميليا بهاء الدين يقول...

اهلا اهلا باهل برج الجوزاء

انا كمان برج الجوزاء

كل سنة وانت بالف خير
ولو انها متأخرة

طبعا القصيدة روعه
مش عارفه اقتبس ايه ولا ايه
بس كلها جمييييييييلة


تحياتى

دعاء مواجهات يقول...

HAPPY BIRTH DAY 2 U LEKOOO

كل سنة وانت طيب ياجميل

احنا لااازم نحتفل باليوم الجميل اللى السماء اديت لينا فية واحد جمييل مثلك

بجد من اول مرة قريت كلامك وانا ادمنتة

انت جميل وتستاهل كل خير

وكلمات الشعر بتاعتك كمان فوق الرائعة

ومرة تانية

كل سنة وانت طيب وعقباال مليون سنة ياجميل...

غير معرف يقول...

بجد حاجه جميله جداااااااااا ياليكو مع انها حزينه اوى بس جميله اوى

بتقول كل كلمه احنا عايزين نقولها
بتقول الى جوانا بضمير

كل سنه وانت طيب ياليكو

Mona Shereif يقول...

علموني أقول كلام
علموني أكتب حروف
علموني أحب بلدي ...
مهما اسمع أو أشوف !

بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي
وابقي قادر ...
اني أكابر ...
مهما اكون ... تعبان حزين !
***********

جباااااااااااااااارة
كل سنه وانت لله اقرب

prince4ever يقول...

صباحه ورد يا ابو نبيل...بلديات بقى ولازم ناخد على بعض...وصيدلي كمان يا برنس وانا ضعيف ادامهم اوي عشان ليا اصحاب هناك بالزوفه...والله يا برنس كلامك عسل اوي اصلي ضعيف برده ادام شعر العاميه ده...بحبه و بحترمه بجد...اشطات يا برنس...و مستنيك عندي في اي وقت يا جميل...سلام يا معلم

ليكوريكا يقول...

رئـــــيسـة حزب الأحلام يقول...

كل سنه وانت طيب
وعقبال مائه عام
والتورتة حلوة اوى بس كلماتك احلى
ربنا يسعدك على فكرة انا عيد ميلادى فى نفس الشهر ابقى استناة
تحياتى

02 يونيو, 2008 08:22 م

شكرا علي مرورك الجميل يا رئيسة حزبنا الحاكم

كل سنه وانتي طيبه برضو

ومستنيين نانسي وهيفا

واوعي تنسي تقوللي لنانسي

(الدنيا وحشه يا نانسي )

ليكوريكا يقول...

FaceMoon يقول...

كل سنة وانت طيييييييييب وعقبال مليون سنة كلامك دايما بيعجبنى حلو كدة وبسيط وبالرغم من بساطته مافيش حد يقدر يكتبة غيرك جميل اوى
يارب السنة دى تحقق كل احلامك وتبقى سنة سعيدة
ومتنساش التورتة والحاجة الساقعة
تحياتى

02 يونيو, 2008 09:17 م

------------------------------

سعيد اوي بردك يا وجه القمر

وكويس ان الكلام عجبك عشان متبقاش اخر مره تنوريني فيها

كل سنه وكلنا اقرب لربنا

تحياتي ليكي

ليكوريكا يقول...

بنت مصريه يقول...

خلاص يا عم عندك 570 سنه مبسووط
ههههههههههههههههههههه
محمد انت هايل يا محمد
احييك يابنى

02 يونيو, 2008 10:53 م

---------------------

ماشي يا بنت مصريه

طب متخليهم 571 عشان يبقوا وتر :)

نورتيني اكيد ... تعالي عندنا كل شويه :)

ليكوريكا

ليكوريكا يقول...

دواير يقول...

أولا كل سنة وانت طيب وعقبال ميت سنة...
ثانيا وللأمانة حاولت اختار حاجة عجبتني ما عرفتش..
لأن بصراحة كل المكتوب عجبني...
بجد القصيدة من أول كلمة لآخر كلمة رااااااااااااااااااائعة...
..لا دي رائعة قليلة عليها جدا...
....صحيح انت كاتب حقوق النشر محفوظة...بس معلش أنا نسختها عشان اوريها لناس بتحب الشعر جدا....مع العلم ان اسمك هيفضل مكتوب من تحت....
معلش على التطفل....بس بجد انا ما كانش ممكن ألاقي قصيدة حلوة بالشكل ده ومات انسخهاش...

---------------------------

اولا منوره البلوج يا دواير وداليما يارب كده تعدوا علينا كل شويه

ثانيا وده الاهم بقي انتي نسختي القصيده ازاي :)))

وبعدين تاخديها كده ببلاش

طيب مفيش اي قرشين تحت الحساب :) طب بلاش فلوس عشان متقوليش اني مادي ...
كنتي طيب ابعتيلي ازازة بيبسي في الرد علي الاقل الواحد يشربها فيوم من الايام الحر دي ...

المهم كفايه هزار بقي ...

انا سعيد جدا ان الكلام عجبك خصوصا اني لسه باديء في كتابة القصايد العاميه ... وسعيد اكتر انك قلتي في الرد هنا انك نسختيها ... لان بجد الموضوع عالانترنت زاد عن حده ، ومحدش بقي بيحترم حقوق حد ولا بيحترم حتي مجرد انه كاتبها

انا اتفاجئت مره بقصه كنت كاتبها من سنتين كده ... نازله في منتدي باسم واحد تاني ومش كاتب اي حاجه عن البني آدم اللي كاتبها ولا حتي كلمة منقول

علي الرغم من ان القصه دي كان تقريبا في كل سطرين مكتوب ليكوريكا ... لان البطل كان اسمه ليكوريكا

المهم انا يشرفني طبعا انك نسختي القصه ... بس ليا طلب عندك واتمني مترفضيهوش

الطب يا ستي هوا انك تقوليلي راي الناس اللي هتقريهم القصيده

ومش عاوز مجاملات ولا اي حاجه ... تقولي الرأي زي مهوا حتي لو كان شتيمه

منوره البلوج مره تانيه وبالتوفيق في الامتحانات يارب :)

ليكوريكا يقول...

just smile يقول...

تعرف محتاره اققول ايه
يعني بجد حاولت اختار جزء أثر فيه لقتني هختار كل الكلام

عموما اتمنى تقتل ليكو الحزين بايديك وبلاش تستنى حد يقتله لانه هيكون ضاع كتير من بقيت عمرك وبدل ما هتسأل انا عمري كام
هتقول هو ايه عمري هو فين ولامين
بجد مبدع

03 يونيو, 2008 05:54 ص

----------------------------

تؤ تؤ

عاوزاني اقتل ليكو :(((

اشهدوا ايها البلوجاريه

ده تحريض علني علي القتل :)))

محدش فينا يقدر يقتل نصه الحزين

كلنا بتمر علينا لحظات فرح وحزن

صحيح الحزن بقي اكتر

بس المد لله علي كل شي

لما بتيجي الفرحه بعد الحزن بيبقي طعمها احلي بكتير

اتمنالك الفرحه والسعاده وربنا يبعد عننا كلنا الحزن

سعيد بمرورك واتمنى متكونش اخر مره

ليكوريكا

ليكوريكا يقول...

غير معرف يقول...

كلماتي تعجز عن التعبير .. بجد اكثر من رائع



زهراء

--------------------------------

رايك اكيد اسعدني يا زهراء

اتمني يكون فعلا الكلام عجبك

ومتبقاش اخر مره تزورينا فيها

تحياتي ليكي

ليكوريكا يقول...

مع ان تعليقي يحمل رقم 13

ومع ان انت اللي قولتلي اني ارد دلوقتي

بس بجد انا قولتلك رأيي الشامل الكامل فيها في المحادثة السابقة

وانت تقبلته بصدر رحب
ولك جزيل الشكر والتقدير والاحترام

:)

بس ابقي قولنا انت كنت جايب الزمزمية دي منين

(اي خدمة يا عم:))
انت تأمرني وانا اردلك في اي وقت يا ليكو باشا

وكل عام وانت بخير
انما صحيح اية اخبار التيشرت الاحمر؟؟

---------------------------

يا جماعه احب اقولكم ان يسري ده كان هيجيبلي نقطه وهوا بيقرا القصيده

كان بيقراها علي وزن نشيد الصباح

او خلينا نقول علي موسيقى ذهب الليل وطلع الفجر والعصفور هو هو

انا حسيت انه بيقرا كلام غير اللي انا كاتبه

عموما متشكرين عالرد يا يسري افندي ياللي بعتلي رسالتين يوم عيد ميلادي

(كلمني شكرا ... ضاعت شريحتك بدلها من فودافون ب 10 بس :))) )

ليكوريكا يقول...

كلمــــــــــــــــة حـــــــق يقول...

السلام عليكم

عمرنا مش بالورقة والقلم
عمرنا مش بالسنة والثانية
عمرنا بفرحنا ودقايق حزننا
اكيد الحزن اكتر والهم اكتر
لكن دقيقة الفرح ف الدنيا بسنة

كل يوم بنشوف وبنروح ونيجى
جوانا امل مدفون بخوف وهموم

لكن ايمانا بان عمرنا بادينا
وحياتنا راح نرسمها بريشة وقلم
وبالتعب والعمل وبسمة تفاؤل
وطريق طويل ناويين نجرى فية
ونحقق بسمة على وجهنا
ونرسم ضحكةعلى عيونا

وكلة بايدينا


وكل سنة وانت طيب وبالصحة والسلامة ولعلمك سن 21 دة حلو اوى تعرف اول لما تميتهم فى مارس اخت علقة تمام اصلى قلتهم انا كدة من حقى اتجوز عرفى لقيت البيت كلة جرى ورايا بس الحمد لله الجرى نفعنى اصل الجرى فى الحالات دى نصف الجدعة ومن رايى هو الجدعنة بعينها


معلش طولت عليك

-------------------------

الله يا كلمة حق

كلامك جميل اوي

سعيد اوي بردك ده

اتمنالك التوفيق والسعاده فكل وقت

وواحد وعشرين سنه مش هتفرق كتير عن واحد وتسعين سنه

اللي في القلب في القب :)

تحياتي ليكي

ليكوريكا

ليكوريكا يقول...

ياسر سليم يقول...

سلام عليكم

ايه يا عم محمد

الأول كل سنة وانت طيب

ثانياً .. كويس جداً انك تسيب كلام تكتبة فى كل عيد ميلاد

وبعد كده هتراجع وتقول انا كتبت كذا فى عيدى الكذا

بس كل ده عشان واحد وعشرين سنة
امال لما تبقى ادى وتوصل لل 24 هتعمل ايه ؟

اكيد هتكتب عيد ام ميتم !

تحيات كبيرات

-------------------------

يااااااااه

اربعه وعشرين سنه

لا لا خلينا في الواحد وعشرين سنه

وزي منتا بتقول بكره نرجع ونقول يااه انا كتبت كذا وكذه لما كان عندي واحد وعشرين سنه

اما بالنسبه بقى لعيد ام ميتم

فيارب متوصل للدرجادي ابدا

سعيد بمرورك ورد ومدونتك عجبتني جدا جدا جدا

تحياتي

ليكيوريكا

ليكوريكا يقول...

اهلا اهلا باهل برج الجوزاء

انا كمان برج الجوزاء

كل سنة وانت بالف خير
ولو انها متأخرة

طبعا القصيدة روعه
مش عارفه اقتبس ايه ولا ايه
بس كلها جمييييييييلة


تحياتى

-----------------------

ايه ده دحنا طلعنا كتير اوي

بسم الله ماشاء الله علينا

هنحتل البلوجرز ولا ايه :)))

كل سنه وانتي طيبه

وسعيد بمرورك ودايما تعدي علينا كل شويه

ليكوريكا يقول...

دعاء مواجهات يقول...

HAPPY BIRTH DAY 2 U LEKOOO

كل سنة وانت طيب ياجميل

احنا لااازم نحتفل باليوم الجميل اللى السماء اديت لينا فية واحد جمييل مثلك

بجد من اول مرة قريت كلامك وانا ادمنتة

انت جميل وتستاهل كل خير

وكلمات الشعر بتاعتك كمان فوق الرائعة

ومرة تانية

كل سنة وانت طيب وعقباال مليون سنة ياجميل...

04 يونيو, 2008 04:43 م

--------------------

وانتي طيبه يا دعاء

منوره البلوج كالعاده

بس مليون سنه قليل

خليهم مليون ونص

كل حاجه غليت ... والمواصلات مولعه

تحياتي ليكي :)

ليكوريكا يقول...

غير معرف يقول...

بجد حاجه جميله جداااااااااا ياليكو مع انها حزينه اوى بس جميله اوى

بتقول كل كلمه احنا عايزين نقولها
بتقول الى جوانا بضمير

كل سنه وانت طيب ياليكو

--------------------------

وانت طيب او وانتي طيبه

سعيد بردك وسعيد اكتر ان الكلام عجبك

كنت اتمني اعرف مين معايا

بس زي مجدو ليكو الكبير بيقول

(كفايه ردك عليا :) )

ليكوريكا

ليكوريكا يقول...

Sometimes يقول...

علموني أقول كلام
علموني أكتب حروف
علموني أحب بلدي ...
مهما اسمع أو أشوف !

بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي
وابقي قادر ...
اني أكابر ...
مهما اكون ... تعبان حزين !
***********

جباااااااااااااااارة
كل سنه وانت لله اقرب

----------------------

منوره البلوج لأول مره

واتمني متكونش اخر مره

كل سنه واحنا كلا اقرب من ربنا

ليكوريكا

ليكوريكا يقول...

prince4ever يقول...

صباحه ورد يا ابو نبيل...بلديات بقى ولازم ناخد على بعض...وصيدلي كمان يا برنس وانا ضعيف ادامهم اوي عشان ليا اصحاب هناك بالزوفه...والله يا برنس كلامك عسل اوي اصلي ضعيف برده ادام شعر العاميه ده...بحبه و بحترمه بجد...اشطات يا برنس...و مستنيك عندي في اي وقت يا جميل...سلام يا معلم

--------------------------

انشاء الله هتلاقيني ناتط عندك كل شويه

انا متعصب اوي لوطني الحبيب الشرقيه

عاوزين نعمل رابطه ونشجع الشرقيه في المظاليم

منورني ويارب متبقاش اخر مره :)))

ليكوريكا يقول...

ليكوريكا يقول...

غير معرف يقول...

ياااه يا نبيل
ليه بس كده؟
دول لسه 21
امال لما تبقى زي حلاتي22 هتعمل ايه :)
حلوة القصيده اوي بجد عجبني فيها مقاطع كتير


بس نسيوا يعلموني
ابقي وقت الشده قاسي
وابقي وقت الهم ناسي
وابقي وقت الحب راسي



حلو دا اوي


اما عن المحتوى
فصدقني...
ماتحسبهاش
محدش بيعيش زياده ولا بيعيش اقل
وكلو بيعدي
الحزن والهم والزعل والضيق والخوف والقلق
حتى الفرحه والحب والامل والحلم والسعاده


كل سنه وانت زي ما انت يانبيل
باخلاقك وقلبك وتيشرتك الاحمر ههههههه


ايمان موافي

-----------------------------

مكنش لازم تمضي يا ايمان

صدقيني من كلامك كنت هعرفك لوحدي

مهو اللسان الطويل وعاوز قصه ده

والتشريد العلني في وسط البلوجاريه وغير البلوجاريه

ورايك طبعا اللي بعتز بيه لانك واحده من الناس اللي بقالها كتير بتكتب وتقرا عامي

فاكيد كنت هعرفك لوحدي

منوره البلوج مع اني عاوز اشوف بلوج ليكي قريب

تحياتي

اخوك محمد

عايش... ولكن !!!! يقول...

لما عدى العمر بيا
وسابني صاحبي
كان ساعتها مفيش معايا زمزميه
وفيوميها ...
بكيت عليا مش عليه ...

لا بجد جامد جدا
كل سنه وانت طيب
تحياتى
علاء

شمعى أسعد يقول...

مع ان المنصورة بلد والزقازيق بلد تانى خالص
انما شبه بعض
اكيد فى حاجة فى جو الزقازيق والمنصورة بتعمل فى الناس كده
بتخليهم بالرقة والجمال ده

غير معرف يقول...

جميل يا محمد .. بس انا جالي اكتئاب وده مش حلو عشاني عندي بكرة امتحان احيااااء وانت عارف بقه يعني ايه احياء ..:((

بس بجد كلامك جميل اوي .. وكل سنة وانت طيب وعقبال ماتكمل ال100 سنه مش بس 21 .. وانت سعيد ومحقق كل اللي بتتمناه .. :))

محاولة لكسر الصمت يقول...

أولا البلوج منور بصاحبه...
ثانيا نسخت القصيدة ازاي؟؟؟
ctrl+c
احنا برضه بنعرف نتصرف...
ثالثا عندك حق النت ده بيبقى مفتوح على الخر وماحدش بيضمن اللي هيكتبه هيوصل لحد فين..

ورابعا..لو كانت دي بدايتك في العامية يبقى اناباتنبالك ان شاء الله بمستقبل باهر في الشعر العامي..

وخامسا..هجيبلك رد الناس دي بس ياريت تستنى شوية عشان الناس دي كلها بتمتحن وتقريبا مش بيفتحوا ايميلاتهم اليومن دول ..يعني مش فاضيين زيي...

...وسلام

momken يقول...

كل سنه وانت طيب
ربنا يستر فى عيد ميلادك التمانين متكتبش قصيده الفين سطر

كل ده على واحد وعشرين

ماشى ياعم

كل سنه وانت بخير
تحياتى

ليكوريكا يقول...

عايش ولكن ...

منور البلوج يا مان

ووانت طيب ودايما منورني ومنور البلوجرز كلها يارب :)

ليكوريكا يقول...

ساره ...

اكيد البيت بيتك ومش محتاجه ترحيب

يارب تكوني عملتي كويس في الاحياء :)

ويارب كلنا نحقق اللي بنتمناه ويقربنا لربنا يارب دايما

ابقي تعالي هنا كتيييييييير :)

ليكوريكا يقول...

دواير ...

القصيده دخلت التاريخ اكيد ...

اولا عشان انتي نورتيها مرتين

وثانيا عشان رايك ده ...

اكيد مستني راي الناس

وربنا يوفقنا كلنا في الامتحانات

ليكوريكا يقول...

شمعي ...

اسف جدا عشان مخدتش بالي من ردك

منورني لاول مره

واكيد زي ممينا وحد القطرين

هييجي يوم واوحد انا المنصوره والزقازيق :)))

اتمني متبقاش اخر زياره :)

ليكوريكا يقول...

momken

ياااااه 80 سنه مره واحده

يامين يعييييييييييييش

منورني اكيد يا ممكن

ولو (ممكن) تنورني كتييييييييييير :)))

ليكوريكا ...

بنت الماضي يقول...

كده يا نبيييل :@
انا لساني عااايز قصه :@
ربنا يسامحك
انا الغلطانه اني بقولهم انك اشتريت تيشرت جديد :):)
وعملت مدونة :):)

غير معرف يقول...

يا عييييينى ..........قطعت قلبى
بس حلو شغال يعنى
بطل كآبة