الجمعة، 13 يونيو 2008

أم ندى ... !




يا ام ندى
الشعر خايف يتكتب
احسن ميوصفش الدلال

ويقول كلام ...
مهوش حقيقه ...
ولا خيــــــــــال !
عارفه الخيال يا ام ندى ؟

الخيال فيكي حقيقه
والحقيقه ...
انتي أجمل مالخيال !

يا ام ندى
انتي الندى فوق الورود
يا ام ندى
انتي الحياه ... انتي الخلود!
يا أم ندى ...
انتي الايدين الطيبه
اللي بلمسه صغيره
تقدر تنسيني الوجود !

يا ام ندى
انتي الخطاوي الفرحانين
انتي الغرام ...
انتي الحنين !
انتي الهلال اللي بيضحك عالنجوم
ويقولهم ...
مالكم كده غيرانين ...
مني ومن بنتي ندى ؟!

يا ام ندى
القلب وياكي ابتدى
يعرف طريقه
ويفك ضيقه
ويبل ريقه
ويقول كلام رقيق أوي ...
زيك كده ... يا أم ندى !

أمّا ندى ...
بنتك وبنتي
خدت جمالها منك انتي
والقلب الابيض
والنني الاسود
والشقاوه والدلع
والشطاره في الحساب

والضحكه اللي ...
الكون بيضحك بعدها
حتي القمر ...
يموت ويسمع ضحكها
وقدمها خير زي السحاب !

يا أم ندى ...
احكي لندى ...
حدوته الشاطر "أنا"
وازاي انا ... بقيت هنا
ويا الايدين الطيبه ...
اللي بلمسه صغيره ...
تقدر تنسيني الوجود !

واما تنام ...
غطيها حب ...
واقري تملي فودنها
"الله أكبر"
"الله أكبر" من كل شيء
يئذيها أو يئذي أمها ...
ام ندى !

يا ام ندى ...
خليكي جنبي
في الحياه المتعبه
محتاج أوي ...
للإيدين الطيبه
اللي بلمسه صغيره ...
تقدر تنسيني الوجود

يا ام ندى
انتي الحياه
انتي الخلود

يا أم ندى ...
انتي الوجود
انتي الوجود !


تمت ...
محمد نبيل الدمرداش
12-6-2008

هناك 26 تعليقًا:

just me يقول...

انت نسيت يوسف خالص يا ابو ندى
حلو اوى ان الانسان يحلم ببكره ويعيشه فى خياله
بس المهم لما ييجى بكره يعيشه حلو زى ماكان بيتمناه
وربنا يخليك ندى يا ابو ندى
وقولها طنطك حسناء بتسلم عليكى

بنت مصريه يقول...

حلو قوى الشعر ده احييك عليه
بس فى سؤال لو سمحت
مين ام ندى دى

ليكوريكا يقول...

Blogger لست أدرى يقول...

انت نسيت يوسف خالص يا ابو ندى
حلو اوى ان الانسان يحلم ببكره ويعيشه فى خياله
بس المهم لما ييجى بكره يعيشه حلو زى ماكان بيتمناه
وربنا يخليك ندى يا ابو ندى
وقولها طنطك حسناء بتسلم عليكى

----------------------------

منوره البلوج يا حسناء

يوسف وندي بيسلموا علي طنتهم الباشمهندزززه :)

----------------------------

فعلا محتاجيبن نحلم

بس للأسف ...

دايما الواقع غير الحلم

الحمد لله :(

ليكوريكا يقول...

بنت مصريه يقول...

حلو قوى الشعر ده احييك عليه
بس فى سؤال لو سمحت
مين ام ندى دى

16 يونيو, 2008 02:45 ص

------------------------------

اممممممممممممم

تصدقي انا نفسي مش عارف ؟!

بس اللي اقدر اقولهولك يا استشاريتنا النفسيه

ان لو انا في يوم من الايام بقيت باذن الله (ابو ندي)

اكيد ساعتها هبقي عارف مين ام ندي ؟!

منوره البلوج

ويارب دايما ...

محاولة لكسر الصمت يقول...

بصراحة لوهلة تخيلت ان ام ندى دي تبقى والدتك...بس وصلت للآخر ومفيش دليل على ده...قلت اقرا التعليقات....لقيت ان الحكاية مش كده خالص...بس عموما كلام جميل اوي واكيد هيعجب ام ندى...يا أبو ندى المستقبلية ان شاء الله...

ليكوريكا يقول...

دواير يقول...

بصراحة لوهلة تخيلت ان ام ندى دي تبقى والدتك...بس وصلت للآخر ومفيش دليل على ده...قلت اقرا التعليقات....لقيت ان الحكاية مش كده خالص...بس عموما كلام جميل اوي واكيد هيعجب ام ندى...يا أبو ندى المستقبلية ان شاء الله...

----------------------------

الكلام ده كله احلام في احلام
وياعالم هيبقي في ابو ندي ولا ام ندي ولا ندي حتي ...

مش عارف واضح ان كان لازم اكتب مين ام ندي في اخر الكلام ...

بس مش كاتب برضو ... :))

نورتي البلوج ...

وانا لازلت مصر ... احنا مش جيل تافه !

قلب ينبض لله يقول...

تسلم الايدين اللي جابتلنا الكلام الجميل دا

بس ياتري ام ندي دا رمز لحاجه فعلا؟

اعتقد اه واعتقد ان الرمز دا هايختلف من شخص للتاني

بنت مصريه يقول...

ردك واقعى يا محمد والله
هههههههههههههه

عايش... ولكن !!!! يقول...

كلامك جميل جدا يا ابو ندى
مش نويت انها تكون ندى بردوا؟
ربنا يكرمك
تحياتى
علاء

ليكوريكا يقول...

قلب ينبض لله يقول...

تسلم الايدين اللي جابتلنا الكلام الجميل دا

بس ياتري ام ندي دا رمز لحاجه فعلا؟

اعتقد اه واعتقد ان الرمز دا هايختلف من شخص للتاني

18 يونيو, 2008 12:57 ص

----------------------------

منوره البلوج بجد

من الناس اللي بستني تعليقهم من بوست للتاني

خلاص البلوج بقي بلوجكم خلاص :)

اما بقي عن ام ندي

فانا كل حاجه قلتها في البوست

واكيد هيا رمز لحاجات كتير مش حاجه واحده

سعيد بمرورك يا : قلب ينبض بالله .

ليكوريكا يقول...

بنت مصريه يقول...

ردك واقعى يا محمد والله
هههههههههههههه

--------------------

للأسف مهو الوةاقع دايما لازم يصحينا من احلي الاحلام

لكن نقول ايه

واقعي واقعي :)))

ليكوريكا يقول...

عايش ولكن يقول...

كلامك جميل جدا يا ابو ندى
مش نويت انها تكون ندى بردوا؟
ربنا يكرمك
تحياتى
علاء

------------------------------

شكرا ليك يا علاء عالزياره والرد الجميل

وياريت كل حاجه ننوي عليها نقدر نحققها

ربنا يوفقنا للي فيه الخير والسعاده دايما يارب :)

غير معرف يقول...

السلام عليكم

حلوة جدا جدا واخلى ما فيها روح الفرح والتفاؤل اللى مليها اصل بصراحة دايما انت واخد مود حزن كدة لكن بدى فعلا كسرت قاعدة شهور بجد حلوة جداااااااا


وربنا يخيلى باذن الله ام ندى

غير معرف يقول...

اسفة جدا بس ممكن اسال على حاجة معلش يعنى ولو فيها رخامة اختك بقى ولازم تستحملها، المهم انت ازاى عامل فى مدونتك عدم امكانية نسخ اى حاجة منها وكل الحقوق ليك انت بما انك المؤلف يا سيدى


شكرا

دكتور بهــدوء يقول...

بجددددددددددد
لا أروع
تحففففه
حلوه اوي اوي اوي

انا اسف ازا كنت متأخر انت عارف ظروف الامتحانات اعذرني

ليكوريكا يقول...

السلام عليكم

حلوة جدا جدا واخلى ما فيها روح الفرح والتفاؤل اللى مليها اصل بصراحة دايما انت واخد مود حزن كدة لكن بدى فعلا كسرت قاعدة شهور بجد حلوة جداااااااا


وربنا يخيلى باذن الله ام ندى

---------------------------------

منوره البلوج يا كلمة حق
وعندك حق يمكن بقالي كتير مكتبتش حاجه مفيهاش كآبه
بس هنعمل ايه
هيا الدنيا كده
يوم فرح ... وعشره حزن
ربنا يكتر ايام فرحنا يارب

وشكرا عالمرور والرد الجميل :)

ليكوريكا يقول...

كلمــــــــــــــــة حـــــــق يقول...

اسفة جدا بس ممكن اسال على حاجة معلش يعنى ولو فيها رخامة اختك بقى ولازم تستحملها، المهم انت ازاى عامل فى مدونتك عدم امكانية نسخ اى حاجة منها وكل الحقوق ليك انت بما انك المؤلف يا سيدى


شكرا

------------------------------

لا لا ولا رخامه ولا حاجه

بصي يا ستي

هوا عباره عن كود بيتحط في صفحة html

بيمنع اي right click في صفحة البلوج الرئيسيه

واول محد يحاول انه يعمل رايت كليك عشان ينسخ او ينقل حاجه

تقوم طالعاله الرساله دي

طبعا دي مبتمنعش حد انه ياخد حاجه

بس اهو تذكره ، جايز الي بينقل يكون عنده دم ويفتكر صاحب الكلام ده ويحفظ حتي حقوقه بكتابة اسمه علي كلامه ...

بس خلاص ...

واي استفسار ليكوريكا دايما داخل نطاق الخدمه

نورتيني مره تانيه :)

ليكوريكا يقول...

دكتور بهــدوء يقول...

بجددددددددددد
لا أروع
تحففففه
حلوه اوي اوي اوي

انا اسف ازا كنت متأخر انت عارف ظروف الامتحانات اعذرني

19 يونيو, 2008 05:16 م

------------------------------

اكيد منور يا دكتورنا

وانت تنور في اي وقت وربنا يعينك علي الامتحانات وقرفها

ويوفقك وباذن الله تطلع احسن دكتور في الدنيا :)

ليكوريكا

Esraa Hamed يقول...

راااااااائعة بجد
بجد مفيش كلام يتقال بعد كده

بجد مبسوطة بيكوا جداااااا
ربنا يخليكوا لبعض

ليكوريكا يقول...

Esraa Hamed يقول...

راااااااائعة بجد
بجد مفيش كلام يتقال بعد كده

بجد مبسوطة بيكوا جداااااا
ربنا يخليكوا لبعض

------------------------------
شكرا ليكي يا اسراء
منوره البلوج
واتمني متكونش اخر زياره

ليكوريكا

المـــفـــــــقــــــــوعـــــة مــرارتـهــا يقول...

بقي كل ده ومش عاوز تبقي كئيب
ده الكآبة قليلة عليك ياراجل

المـــفـــــــقــــــــوعـــــة مــرارتـهــا يقول...

آدي حال امنا اللي مطلعة عينينا ومبهدلة حلمنا

ليكوريكا يقول...

المـــفـــــــقــــــــوعـــــة مــرارتـهــا يقول...

بقي كل ده ومش عاوز تبقي كئيب
ده الكآبة قليلة عليك ياراجل

23 يونيو, 2008 04:52 م


----------------------------------

فين الكآبه بس

دي حتي من النوادر اللي كتبتها موش كئيبه

:)))

ليكوريكا يقول...

المـــفـــــــقــــــــوعـــــة مــرارتـهــا يقول...

آدي حال امنا اللي مطلعة عينينا ومبهدلة حلمنا

-------------------------------------

تمام :)))

ليكوركيا

Blue Nile يقول...

فكرتك حلوة اوي يا ابو ندى:))
بجد جميل انا بحب الشعر العامي اوي
وكلامك كمان بيوصل بسرعة ماشاء الله
اول تعليق في مدونتك ومش الاخير ان شاء الله

ليكوريكا يقول...

Blue Nile يقول...

فكرتك حلوة اوي يا ابو ندى:))
بجد جميل انا بحب الشعر العامي اوي
وكلامك كمان بيوصل بسرعة ماشاء الله
اول تعليق في مدونتك ومش الاخير ان شاء الله

----------------------

اتمني فعلا ميكونش الاخير

منوره البلوج

وسعيد بزايرتك وردك :)