الجمعة، 10 يونيو 2011

لسه كتير ...


لسه كتير ... !

------------------


والسنادي حاجات كتير اتغيرت ...


تفتح القلب الحزين

اللي مليان بالانين

تلقى روح ...


روح بجد طيبه

من آهاته قريبه

ولو لقيت "راحه" فيه ...

تبقى من خوفها عليه

والحنين...


والحنين والحنان

والدفا والامان

كان بيحلم بيه زمان

لما كان لسه عمره ...

ثانيتين !



والسنادي حاجات كتير اتغيرت ...


واتبخرت ... احلام كتير

وسط دوامة الحياه


قلت آآآه ...


فين حبايبي - راحوافين ؟

مين فايتني - وجمبي مين ؟


ايه اللي راح ؟

ايه اللي باقي ؟


يوم لقايا ويوم فراقي !


مين يحس بجرحي مين؟!


والسنادي حاجات كتير اتغيرت ...


القلب داب

والشعر شاب

عملولي في "النحس" كتاب

اسمي منور عالغلاف

والصوره دي صورتي أنا ...


انا شاب لو شاف الهنا

بيحسدوه ...


ولو شافووه ...

هيقولوا عمره 100سنه ...


مع ان لسه ...

معاشي منهم غير سنه :(



والسنادي حاجات كتير اتغيرت ...


ضهري اللي لسه مشافش هم

لقيته حالف ينحني

وجبهتي ...

مرفوعه بيكو في محنتي ...

يا اصحاب سنيني

ودنيتي ...

من غيركوا شيء مستحيل :(


والجميل انهم ...

دايما معايا بقلبهم

لو اي وقت احتاجتهم

من غير كلام ... موجودين :(



والسنادي حاجات كتير اتغيرت ...


الفراق كان النهايه

معدشي ليه فاضل معايا ...

غير آهاتي ووحدتي

وصبري علي طول غربتي

والصبر مرّ ...


والأمر ...

تدوق لواحدك مالكاسات

ومتتسطلش :(


اصله حرام

تنسى الآلام ...


تبقى وحيد

وكمان سعيد ؟


ايه الجشع ده يا جدع

ليه الطمع ؟


ايه يعني لما تسيب قلوب بتحبها ...

تشتقلها ؟

والله عيب !


ايه يعني احلامك في يوم بدلتها ...

ودفنتها ...

ايه الغريب !


ايه يعني لما تكون دموعك ...

هيا الصديق والحبيب !



والسنادي حاجات كتير اتغيرت ...


واتغيرت ...

طيبة القلب وصفاها

والبياض اللي ملاها ...

من زمان



واللي كان ...

كله كان

والامان ... والحنان


زي ما يكون السنين

تزرع الخوف والأنين

في القلوب


والعمر زي المركبه

بتعدي بحر

والبحر بيدغدغني

ويدوخني

برغم اني فيه بدوب!


والحلم طير ...

ازاي يطير من غير جناح

من غير براح

من غير امل ...

هيروح لفين ؟


انا مش حزين

لكني بنزف من سنين العمر- عمر ...

وبرغم ان حاجات كتير اتغيرت ...

في قلبي صبر ...

بيقولي زي مراح حاجات

وحاجات كتير بقو زكريات


لسه كتيـــــــر :(


______________________


عيد ميلادي ال 24

محمد نبيل

6-6-2011