ذكريات بتموت ...
ساكته من غير صوت
واللي نحلم بيه
بيهرب ليه ؟
أوام ويفوت ؟!
ضحكه بين قلبين
عين بتحضن عين
وقت عدى أوام
بجد حرام ...
يروح ويفوت !
كلمتين وسلام ...
وكف بكف
نمشي ...
نلف ...
ننسى الدنيا
نزعل مرّه ...
نضحك ألف !
أو اغني
غصب عني ...
رغم اني
صوتي لو سجلته تلقى ...
الشريط بيسف !
ويضحكوا عليا واضحك
هوّا فيه زي صاحبك
لما يبقي جنب قلبك
يوم في فرحك ... يوم في تعبك
لو تصلي يبقى جنبك
هنا في نفس الصف !
هوا في زي الصراحه
نحكي نلقى بجد راحه
تقوللي رايك ...
تاخد برأيي ...
واما بزعل تبقى عارف
عاللي بيننا تبقى خايف
تعتذر ...
على طول اسامحك
من غير مبنطق حرف !
مركب الايام
يعدي اوام
شراع الدنيا
وصلّنا بسرعه
قلنا : تاخد كام ؟
قال : سنين الحب
ويا فرحة قلب
قال : غرام وحنين
وكام ضحكه ودمعه
عالخدود نازلين ...
قال : هفرقكم
واشوقكم
للحظه عشتوا فيها سنين جميله
وانتو مش حاسين !
كل ده هيكون فثانيه ذكريات
تضحكوا فيها وتبكوا عالحاجات
واما تيجوا تفكروا
وتدوروا ...علي اللي فات؟
تلقوا حتى الذكريات
خايفه تبان ...
خايفه تخرج من زمان
وتيجي بكره ...
تلقى مش ليها مكان !
تلقوا ايام السنين
هربانه منكم ...
واللي كان بيننا وبينكم ...
وقت عدى ... وماضي مات !
الوداع يا ذكريات ...
وبكره جايز نلتقي
ونبتدي حبة حاجات
تبقى بعد بكره برضو ...
ذكريات !
ذكريات بتموت ...
ساكته من غير صوت
واللي نحلم بيه
بيهرب ليه ؟
أوام ويفوت ؟!
14-4-2009
مستنيكم كل جمعه باذن الله علي مدونه
"يارب فرحه"
اضغط هنا
هناك 6 تعليقات:
(أي ذكرى هي مؤلمة بالضرورة, حتى لو كانت من ذكريات اللحظات الهانئة, فتلك مؤلمة لفواتها)..
هكذا هي الحياة, لكن عفوا سيدي, ربما نودع الأصدقاء, الأحبة, الأمكنة, اللحظات الجميلة, لكننا أبدا لا نودع الذكريات, لا لشيئ سوى أنها تحيا بداخلنا وليست ملكا لأحد سوانا, لا أقصد أننا لا نفقدها, بل نفعل, ولكن حينها لا نحظى بفرصة لوداعها, باختصار لأنه "قهرا قد تنسى الأشياء"...
تحياتي لشاعر متميز...
علي فكره ساعات الذكريات الحلوه بتكون مؤلمه اكتر من الذكريات الاليمه اصلا
^_^
كلماتك جميله
طالعه من قلب حزين
الإبتسامة ممكن تكون الدوا
لكن الذكريات ماضي مؤلم لكنه جميل
أحيك غلى كلامك اللي هو ديما رااائع
أخوك
أمير الهدوء
الله جميله اوي كنت عاوز اكتب حاجه نفس الفكره بس اعتقد مش هاتكون اجمل من كده
احيكي وادعوكي لزياره مدونتي
تحياتي
ادم
ذكرياتنا جزء منا لا نستطيع ان نودعها او نرسلها بعيدا
قد تكون مؤلمة او مفرحة
ولكنها تستحق منا الاحتفاظ بها
تحياتى
هوّا فيه زي صاحبك
لما يبقي جنب قلبك
يوم في فرحك ... يوم في تعبك
لو تصلي يبقى جنبك
هنا في نفس الصف !
دي بجد جميلة جدا وعجبتني
ماتعرفش ليه الحاجة الحلوة عمرها قصير أو طويل بس دايما شايفينها مش كفاية ومحتاجين منها كتييير
تسلم أيدك علي اللي كتبته واللب تكتبه دايما
إرسال تعليق